Oraza Bayramı mubarek olsun! 

20.03.2026

Degerli soydaşlar, aziz din qardaşlarım! 

Bu sene mubarek Oraza Bayramını qarışıq duyğularnen – em bayram sevinçinen, em de Ana Yurtumızğa, milletimizniñ başına rusiye işğali ketirgen acılarnen qarşılaymız.

Bu muqaddes künlerde tutqan orazalarımız, dualarımız, ibadetlerimiz epimizni – em da vatanımız Qırımda basqı altında qırımtatarlığını qorçalagan qardaşlarımıznı, em de vatanımıznı terk etmege mecbur olğan soydaşlarımıznı da çoq birleştirdi, saflarımıznı sıqlaştırdı.  Bazılarımız bir-birimizden uzaqta olsaq da. Lâkin yüreklerimiz Qırımnen birdir.

Aynı zamanda Ukrayina Silâlı Quvetleri saflarında rus barbarlarına qarşı cenkleşken Qırımtatar askerlerimiznen ğururlanamız. Olarğa minnetdarlığımıznı bildiremiz. Olarnıñ cesürligi – Ukrayina, Qırım ve qırımtatar halqınıñ keleceginiñ temelidir. Rabbimiz bizim askerlerimizniñ quvetlerini arttırsın, kendilerini qorçalasın. 

Şeitlerimizni rahmetnen añamız. Vatan, iman ve namus oğrunda canlarını feda etken şeitlerimizniñ hatırası ögünde sayğınen baş egemiz. Olarnıñ birisi bile halqımız tarafından unutılmaycaq. İnşalla, olarnıñ episi Allahnıñ merametindedir!

Rus işğalcilerinden azat etilgen Qırım Ana Vatanımızda eñ yaqın vaqıtta epimizniñ toplanğanımıznı tileyim. Bütün siyasiy mabüslerimizniñ serbest etilmesini ve eñ qısqa zamanda ailelerine qavuşmasını tileyim. Allah Ukrayinağa Ğalebe bağışlasın! Qırımtatar halqına ise öz Vatanında bahtlı yaşayışnı bersin.

Allah Taalâ adaletli ve merametlidir. Qırım – bizge fenalıq ve belâ ketirgenlerden temizlenilecek. Qırım serbest olacaq, onıñ er bir tarafında er bir köşesinde ise daima Ukrayina devlet bayrağı ve qırımtatar milliy bayrağı dalğalanacaq.

Sayğılı dostlar, degerli dindeşler, Qırımtatar Milliy Meclisi adından epiñizni Oraza Bayramınen hayırlayım.

Oraza Bayramı epimizge mubarek olsun! 

Refat Çubarov

Qırımtatar Milliy Meclisiniñ Reisi