Qırımtatar halqı Qurultaynıñ Teftiş komissiyası aqqında Nizamname

Qırımtatar halqı Qurultaynıñ Teftiş komissiyası aqqında Nizamname

I. Umumiy nizamlar

1.1 Qırımtatar halqı Qurultayınıñ Teftiş komissiyası (ileride Teftiş komissiya) –  saylanma ve daima areket etken Qurultay organı. Öz faaliyeti aqqında Teftiş  komissiyası Qurultayğa esabat bermek ve onıñ qararları ve bu Nizamnamenen  qullanmaq borclu. 

1.2 Qurultay Teftiş komissiyasınıñ qırımtatar halqınıñ Milliy Meclisi ve diger  Qurultay organlarınen munasebetleri bu Nizamname, qırımtatar halqınıñ Meclisi  aqqında Nizamname ve diger Qurultay qararlarına esaslanıp qurula.

1.3 Teftiş komissiyası aqqında Nizamname Qurultay tarafından qabul oluna. 1.4 Teftiş komissiyası Aqmescit şeerinde yerleşe. 

 ІІ. Şekillendirüvi,qurulışı ve faaliyetiniñ şekillenüvi 

2.1.Teftiş komissiyasınıñ erkânı Qurltay delegatları tarafından gizli rey berüvnen  saylana. Qmissiya azalarınıñ sayısı Qurultay tarafından belgilene. Eñ çoq ses  qazanğan namzetler komissiya azaları sayılalar. 

2.2. Teftiş komissiyasınıñ reisi vazifesine komissiya azaları tarafından teklif olunğan  ve Qurultayda tasdiqlanğan namzet tayinlene. 

2.3. Teftiş komissiyasınıñ reisi ve onıñ azalarınıñ Qurultaynıñ diger daimiy sürette  çalışqan saylanma organları ve milliy öz-özüni idare etüv organlarınıñ azaları olmağa aqqıları yoq. 

2.4. Teftiş komisstâsı 5 yılğa saylana. 

2.5. Teftiş komissiyasınıñ resi, o olmağanda onıñ muavini: 

– Teftiş komissiyasınıñ faaliyetini teşkil ete; 

– Milliy Meclis ve onıñ Prezidium toplaşuvlarında komissiyanı taqdim ete; – Teftiş komissiyası toplaşuvınıñ protokolı ve onıñ qararlarını; 

– Teftiş komissiya azalarına vazife bere 

– Teftiş komisiyasınıñ azalarına reberlik yapa; 

– Teftiş komissiyasınıñ qararları yerine keçirilmesini nezaret ete; 2.6. Teftiş komissiyasınıñ toplaşuvları zarur olğanda, amma eki ayda bir kereden az  olmamaq kerek. Komissiya toplaşuvlarında alınğan qararlar komissiya azalarınıñ 2/3 payı iştirak etken taqdirde uquqlı sayıla. Teftiş komissiyasınıñ qararları toplaşuvda  iştirak etkenlerniñ ekseriyeti rey berüvnen qabul oluna; 

 III. Aq-uq ve vazifeleri 

3.1. Teftiş komissiyasınıñ esas vazifesi – Qurultay qaralarınıñ amelge keçirilmesini,  daimiy Qurultay organlarınıñ qırımtatar halqınıñ öz-özüni idare etüv organlarınıñ  faaliyetini nezaret astında tutmaq. 

3.2. Teftiş komissiyasınıñ aqqı: 

– Qurultay ve Meclis tarafındantasdiqlanğan episi idarelerniñ faaliyetini nezaret  etmek; 

– Nizamname esasında qırımtatar halqı Meclisiniñ işi ve maliyeviy faaliyetini nezaret  etmek; 

– qırımtatar hlqınıñ qaytuvı ve yerleştirüvine ayırılğan sermiyalarnı işletken episi  mülkiyet şekline ait olğan teşkilâtlarnıñ faaliyetini teşkermek;

 – öz fikirine esaslanıp, teşkerüvlerniñ neticelerini uquqqoruycı organlarına teslim  etmek; 

-Meclis ya da onıñ Prezidiumınıñ nevbetten tış toplaşuvını talap etmek;  – selâhiyeti çerçivesine kirgen meselelerniñ Meclis ve onıñ Prezidiumı  toplaşuvlarınıñ kün tertibine kirsetilmesini teklif etmek; 

-qırımtatar halqı Meclisi ve onıñ Prezidium toplaşuvlarında iştirak etmek ve baqılğan  meseleler boyunca öz tekliflerini kirsetmek; 

– milliy öz-özüni idare etüv organlarınıñ işinde iştirak etmek, olarğa muracaat etmek  ve bu organlarğa yollağan soravlarğa cevap almaq ve malümat toplamaq; – sürgün olunğan grajdanlarnıñ meselelerinen oğraşqan devlet, ticaret ve diger  organlarğa maddiy meselelernen bağlı soravlar yollamağa ve cevap almağa, olarnıñ  faaliyei boyunca öz tekliflerini kirsetmege; 

– qırımtatar halqı Meclisiniñ ve öz-özüni idare etüv organlarınıñ maiyetinde  bulunğan sermiya ve maddiy zenginlikleriniñ maqsadlı işletilmesini teşkermek.  Yuqarıda añılğan organlar Teftiş komissiyasınıñ talabına binayen, maddiy esabat  yollamalılar; 

– öz-özüni idare etüv organlarınıñ faaliyeti boyunca tüşken arizalar, teşkilât ve adiy  insanlar tarafından muracaatlar ve şikâyetlerni baqmaq; 

3.3. Teftiş komissiyasınıñ vazifeleri: 

– Qurultayğa öz işi, Milliy Meclis ve onıñ Prezidiumınıñ işine qıymet kesip, esabat  yollamaq 

– Alıp barğan teşkerüvleriniñ neticelerinen qırımtatar halqı Meclisini ve teşkerüv  alınıp barılğan organlarını tanış etmek; 

– Toplaşuv neticeleri boyunca protokol yazmaq; 

– kontrol faaliyetini vesiqalarnen resmiyleştirmek 

– qutleviy informatsiya vastaları yardımınen Qurultay qarlarınıñ amelge keçirilmesi  ve qırımtatar halqı Meclisiniñ faaliyetinen tanış etmek; 

IV. Teftiş komissiyasınıñ faaliyetini temin etmek 

4.1. Teftiş komissiyasınıñ işinde zarur olğan maddiy ve tehnikiy astalar Milliy Meclis tarafından teminlene 

4.2. Teftiş komissiyası zarur olğan allarda öz işine mütehassıs ve ekspertlerni teklif  ete bile. 

Yañı şekilde qoşma ve deñişüvlernen qırımtatar halqınıñ IV Qurultayında qabul  olundı. 

Aqmescit ş., 2004 s 12 sentâbr.