Qara qış ayınıñ 22-si – Ukrayina Birdemligi künü

22.01.2026

Ürmetli vatandaşlar!

Sayğılı dostlar!

Er yıl, qara qış ayınıñ 22-nde, Ukrayina Birdemligi kününi qayd etemiz. O, 1919 senesi qara qış ayınıñ 22-nde Ukryaina Halq Cumhuriyeti ve Ğarbiy Ukryaina Halq Cumhuriyetiniñ Birleşüv Aktınen ilân etilgen ve ukrayin milletiniñ öz evinde, Ukrayina devletinde serbest yaşamaq iradesini temsil etken ukrayin topraqlarınıñ yekâne devlette tarihiy birleşüvini timsal ete.

Tarih tekrarlana…

Bir asır evelsi olğanı kibi, Ukryainanıñ birdemligi kene ateş sınavından keçe: Rusiye istilâcısı Ukrayinanıñ topraqlarını yıqmağa tırışa, 2014 senesi kiçik ayda Qırım işğalinen başlağan ve 2022 senesi kiçik ayda Ekinci cian cenkinden soñ Avropada eñ qanlı cenkke çevirilgen Ukrayinağa qarşı cenkni başlattı.

Amma, 1918-1919 seneleriniñ şanlı ve aynı zamanda facialı vaqialarından esas farqı bar: bugün Ukrayina, topraq bütünligi ve suverenitetini qorçalap, dünyanıñ iradeli halqlarınıñ destegine tayanıp, daa da birdem ve küçlüdir. Bu Ukrayinanıñ vaqtınca işğal etilgen topraqlarınıñ, şu cümleden Qırım Muhtar Cumhuriyeti ve Aqyar şeeriniñ işğalden azat etilmesi, Ukrayinada umumiy, adaletli ve devamlı barışıqnıñ tesis etilmesi ve bütün dünya içün telükesizlikniñ temin etilmesidir.

Qırımtatar halqı içün birdemlik tam bir timsal ola ve Rusiye işğalcilerinden azat etilgen ve tek Ukrayina devletinde öz qanuniy yerine qaytarılğan Qırım boyunca Ukrayina Devlet bayrağı ve qırımtatar milliy bayrağı yan-yanaşa köterilgende tamamlanacaq.

Şübesiz ki, Qırımnıñ kelecegi – Ukrayinada milliy-topraq muhtariyeti. Tamır qırımtatar halqınıñ öz toprağında öz-özüni belgilev aqqı böyle etip temin etilecek ve küçlü, inkişaf etken, mustaqil ve demokratik Ukrayina devletiniñ kefaleti temin etilecek.

Ukrayinanıñ birligi içün canını feda etken bütün nesillerniñ qaramanlarınıñ parlaq hatırası ögünde başımıznı egemiz.

Rusiye istilâsına qarşı cenkte devletimizniñ suverenitetini ve topraq bütünligini qorçalağan Ukrayina qorçalayıcılarına teşekkür bildiremiz.

Ğalebege birlikte!

Qırım – bu Ukrayina!

Refat Çubarov

Qırımtatar Milliy Meclisiniñ Reisi

2026 senesi qara qış ayınıñ 22-si

Kıyiv ş.