Deñiz piyadesi Eskender Kudusov esirlikten azat etildi

05.02.2026

Bugün, kiçik aynıñ 5-nde, Rusiye esirliginden 157 ukrayin askeri azat etildi. Azat etilgenler arasında – deñiz piyadesi, serjant Eskender Kudusov.

Qırımtatar Milliy Meclisi Eskender Kudusovnı azatlıqqa qaytqanınen samimiy hayırlay, onıñ tuvğanları ve yaqınlarınıñ sevinçini paylaşa.

Eskender Kudusov (1984 senesi doğğan) – arbiy hızmetçi. O, Ukrayina Silâlı quvetlerinde hızmetini 18 yaşında müddetli hızmetten başladı, soñra orduda qaldı. İraq (2004-2005 seneleri) ve Kosovodaki (2009 senesi) barıştırıcı missiyalarda iştirak etti.

2014 senesi Eskender Kudusov Kefede yerleşken Deñiz piyade askerleriniñ Birinci ayrı batalyonında hızmet ete edi. Qırım vaqtınca işğal etilgen vaqıt o, Ukryaina antına sadıq qaldı, Rusiye Federatsiyası tarafına keçmege red etti ve qardaşlarınen beraber Ukrayinanıñ qıtaiy qısmına, Mıkolayiv şeerine ketti, anda hızmetini devam etti.

O, Donetsk vilâyetinde tolu miqyaslı istilâ başlağanınen cenkleşken edi. 2022 senesi çeçek ayında Mariupol içün uruşlar vaqtında Eskender Kudusov esir alındı. Rusiye tarafı Eskender Kudusovnı 25 yılğa apiske aldı, amma 2025 senesi orta küz ayında r sert rejimli müstemlekedeki apis cezası 29 yıl ve 6 ayğa uzatıldı.