Dünya tamır halqları künü munasebetinen Qırımtatar Milliy Meclisiniñ Prezidiumınıñ BEYANATI

09.08.2025

Er sene arman ayınıñ 9-nda Dünya tamır halqları halqara künü qayd etile – er bir tamır halqınıñ öz toprağında serbest yaşamaq, öz medeniyetini, tilini, ananelerini saqlamaq ve inkişaf ettirmek, topraqnı ve tarihiy ceetten öz yaşayışınen bağlı olğan tabiat resurslarını idare etmek aqqı aqqında hatırlatmaq ve tasdıqlamaq içün.

Ukraina içün bu, vatanı Ukraina devletiniñ mustaqil toprağı olğan Qırım olğan qırımtatarlar, qaraylar ve qırımçaqlar içün ayrı diqqat künüdir.

2014 senesi kiçik ayda Qırımnıñ işğalinen başlanğan ve on eki yıl devam etken Rusiye-Ukraina cenki Ukraina tamır halqlarınıñ yaşayışına doğrudan-doğru telüke yarattı. Qırımtatar halqını maqsatlı taqip etüv ve basqılar, Qırımtatar Milliy Meclisiniñ yasaq etilmesi, Rusiye işğalli ordusına zorbalıqnen celp etilmesi, Qırımnıñ demografik terkibini deñiştirmek maqsadınen Rusiye vatandaşlarınıñ kütleviy sürette köçürilmesi, tamır halqlarınıñ tarihiy mirasını yoq etüv ve ruslaştıruv, topraqlarnıñ banditler tarafından alınması ve yarımadanıñ tabiiy resurslarını hırsızlap qullanuvınen beraber olğan tam bir uquqsızlıq, Qırımdaki qırımtatar halqına qarşı Rusiye imperiyası ve Şuralar Sotsialistik Cumhuriyetler Birligi zamanında yapılğan genotsid siyasetiniñ devamıdır.

Ukrainağa qarşı Rusiye istilâsı ve Qırımnıñ işğali neticesinde Ukraina tamır halqlarınıñ barlığına doğrudan telüke olğan vaziyette qırımtatar, qaray ve qırımçaq halqlarınıñ saqlanuvı, inkişafı ve keleceginiñ kefaleti içün tek şart – Ukraina topraq bütünliginiñ halqara seviyede tanılğan sıñırlarda, şu cümleden Qırım Muhtar Cumhuriyeti ve Aqyarda, ğayrıdan tiklenmesidir.

Bu munasebetnen ve Dünya tamır halqlarınıñ halqara künü Qırımtatar Milliy Meclisiniñ Reisi çağıra:

•halqara toplulıqnı – Rusiye Federatsiyasına istilâ ve Ukraina topraqlarınıñ işğali toqtatılması içün siyasiy, iqtisadiy ve sanktsiyalar basqısını quvetleştirmege;

•Ukraina akimiyet organlarını – “Ukrainanıñ tamır halqları aqqında” Ukraina Qanunınıñ amelge keçirilmesini temin etmege ve olarnı qorçalav devlet siyasetini inkişaf ettirmege;

•yañı tanılğan Ukraina ükümetini – “Ukrainanıñ tamır halqları aqqında” Ukraina Qanunınıñ tamır halqlarnıñ temsil organlarınıñ uquqiy statusını pekitmege ve Meclisniñ tamır qırımtatar halqınıñ temsil organı olaraq uquqiy statusı aqqında qarar qabul etüvinen bağlı qabaatlav ameliyatını toqtatmağa

•cemiyetni – Ukrainanıñ tamır halqlarınıñ tili, medeniyeti ve tarihiy hatırasını qorçalav teşebbüslerine qol tutmaq ve birdemlikni saqlamağa

Bütün Ukraina vatandaşlarını Dünya tamır halqlarınıñ halqara kününen hayırlap, eminlik bildiremiz ki, Qırımnıñ Rusiye işğalinden azat etilmesi künü em Ukrainanıñ tamır halqları, em de bütün ukrain siyasiy milleti içün aq ve itibarını tiklev künü olacaq!

Yaşasın Qırım Vatanımız!

Yaşasın Ukraina Devletimiz!

Ukrainağa şan-şerefler!

Qırımtatar Milliy Meclisiniñ Reisi

Refat Çubarov

2025 senesi arman ayınıñ 9-ı

Kıyiv ş.