Qırımtatar Milliy Meclisiniñ Prezidiumınıñ Rusiye tarafından Azerbaycanğa qarşı yapılğan provokatsiyalar şaraitinde  azerbaycan halqına qol tutuv aqqında beyanatı 

04.07.2025

Rusiye ve Azerbaycan arasındaki munasebetlerniñ keskinleşmesi rusiye imperiyasınıñ esas siyasetini köstere. O, Rusiyeniñ esir halqlarınıñ iradesini bastırmaq, diger halqlar ve olarnıñ topraqları üzerinde ükümdarlıq yapmaqnen yekünlene.

Aynı zamanda  2025 senesi ilk yaz ayınıñ 27-nde Yekaterinburgda rusiye quvetli organları tarafından qavmiy azerbaycanlılarğa, em Azerbaycan vatandaşlarına, em de rusiye vatandaşlarına qarşı yapılğan qanunsız repressiya areketleri, Kremlniñ niyetine köre, rusiye akimiyetiniñ Azerbaycanğa nisbeten kerçek maqsadı ve vazifelerini gizlemek içün cinayetke qarşı tedbirler olaraq yapıldı.

Añlaşılır kş, rusiye yayğarasınıñ ve Azerbaycağa qarşı nefretiniñ kerçek sebepleri arasında:

– Azerbaycannıñ bağlı olmağan, mustaqil ve suveren tış siyasetiniñ quvetleştirilmesi;

– Azerbaycan ve azerbaycan halqınıñ Ukrayina topraq bütünligine qol tutuvı, Rusiyeniñ Qırım ve Ukrayinanıñ diger işğal etilgen topraqlarını işğal etüv ıntıluvlarını tanımamaları. Azerbaycannıñ Ukrayinağa gumanitar yardım kösterüvi;

– Azerbaycannıñ Türkiyenen strategik ittifaqınıñ pekitilmesi, Ermenistannen eyi qomşular munasebetleriniñ qurulması,

– Rusiyeniñ Cenübiy Kavkazdaki mevamınıñ zayıflatılması;

– Azerbaycan, Qazahistan, Qırğızistan, Özbekistan ve Türkiyeniñ Türk devletleri teşkilâtı çerçivesinde birleşmesi sebebinden rusiyeniñ sovetlerden soñ olğan topraqlarda siyasetiniñ bozulması. Moskvanıñ türk halqlarınıñ birleşmesini rusiyeniñ içinde esir etilgen türk milletleriniñ faalleşüvi olaraq qabul etmesi,

– Azerbaycannıñ Avropa energetik bazarındaki rolüniñ quvetleştirilüvi.

Rusiye ve Azerbaycan arasındaki munasebetler kerginleşkeni sebebinden, rusiyeniñ provokatsiya ve açıq duşman areketleri sebebinden, Qırımtatar Milliy Meclisiniñ Reisi devletlerniñ, halqara teşkilâtlarnıñ ve halqara toplulıqnıñ diqqatını Rusiye akimiyeti tarafından em rusiyeniñ esir halqlarına, em de mustaqil devletlerniñ halqlarına qarşı, şu cümleden vatanı rusiye tarafından işğal etilgen Qırımnıñ Ukrayina devletiniñ ayırılmaz bir parçası olğan qırımtatar halqına qarşı rus qavmiy çoqluğını seferber etmek maqsadınen imperiya, şovinistik ve ksenofobiyalı duyğularnı inkişaf ettirgenine celp ete.

Qırımtatar Milliy Meclisiniñ Reisi rusiye quvet organları tarafından Yekaterinburgda azerbaycan cemiyetine qarşı yapılğan provokatsiyalar neticesinde zarar körgen ve elâk olğanlarnıñ tuvğanlarına ve yaqınlarına taziye bildire.

Qırımtatar Milliy Meclisiniñ Prezidiumı Azerbaycan halqına ve Azerbaycan Cumhuriyetine Ukrayina devletiniñ suvereniteti ve topraq bütünliginiñ halqara seviyede tanılğan sıñırları ve topraq suvları çerçivesinde ardı-sıra desteklegenleri içün minnetdarlığını bildire.

İnanamız ve bilemiz ki, tek Ukrayina istilâcı imperiyalı tış siyasetini alıp barğan rusiyege qarşı ğalebe qazansa, mustaqil devletlerniñ barışıqlı yaşayışı ve muvafaqiyetli inkişafını temin etecek bütün şarait peyda olur.

Refat Çubarov

Qırımtatar Milliy Meclisiniñ Reisi

Kıyiv ş.,

2025 senesi oraq ayınıñ 3-ü