Qırımtatar Milliy Meclisiniñ Prezidiumınıñ vaqtınca işğal etilgen Qırımda qırımtatar qadınlarınıñ evileriniñ kütleviy tintmeleri ve olarnıñ qanunsız apiske alınması aqqında beyanatı

16.10.2025

2025 senesi orta küz ayınıñ 15-nde Rusiye Federatsiyası tarafından vaqtınca işğal etilgen Qırımda qırımtatar halqına qarşı öz sertligi ve tsinizminen tolu cinayetler yapıldı.

Saba saat dörtten beşke qadar Rusiye işğalli quvet strukturaları qırımtatarlarnıñ dört evine – Bağçasaray şeerinde, Bağçasaray rayonınıñ Topçıköy (işğalli adı Dolınne) ve Zalanköy (işğalli adı Holmivka) köylerinde, em de Aqyar memuriy şeeriniñ sıñırında yerleşken Mamaşay (işğalli adı Orlovka) köyünde silâlı ücümler yaptı.

Şaatlarnıñ aytqanlarına köre, “balıqlava” taqqan silâlı insanlarnıñ ücümi sert zorbalıq, aşalav ve qorqutuvnen keçe edi. Erkeklerni yerge urdılar, qollarını bağladılar, qıçırdılar, qorquttılar, çağına yetmegen balalarnı qıçıra-qıçıra uyandıralar, yataqlarından köterip çıqardılar, rus tilinde laf etmege talap ettiler.

Evlerniñ sözde “tintüvleri” Rusiye işğalcileriniñ ve olarnen beraber ketirilgen insanlarnıñ areketlerini sakinlerniñ nezaret etmek imkânını bütünley red etken bir şekilde keçirildi. Ailelerden iç biri Tintüvler vaqtında işğalciler tarafından tapılğan ve “federal aşırıcı materiallar cedveli”ne kirsetilgen kitaplarnı tanımadı. Belli ki, bu sefer de, qırımtatarlarnıñ evlerinde keçirilgen tintüvlerde olğanı kibi, kitaplar Rusiye quvetçileriniñ daa bir cinaiy davanı uydurmaları içün qoyuldı.

Tintüvlerden soñ tevqif etilip, “RF FSBniñ Qırım Cumhuriyeti ve Aqyar şeerindeki idaresi”ne çıqarılğan qırımtata qadınları arasında:

• Esma Nimetullayeva, Bağçasaray şeeriniñ sakini, 39 yaşında, tatlı pişirici, çağına yetmegen beş qıznıñ anası, 2023 senesinden berli “terror teşkilâtınıñ faaliyetini teşkil etüv”de uydurılğan qabaatlavlar boyunca apishanede qanunsız tutulğan siyasiy mabüs Remzi Nimetullayevniñ apayı,

• Elviza Aliyeva, Bağçasaray rayonınıñ Topçıköy (Dolınne) köyünde yaşay, 20 yaşında, furunhanede kassir, “Qırım federal universiteti”niñ IV-nci kursta oquğan “menecment” ihtisasınıñ studenti,

• Fevziye Osmanova, Mamaşay (Orlovka) köyünde (Aqyar) yaşay, 21 yaşında, tükân satıcısı,

• Nasiba Saidova, Bağçasaray rayonınıñ Zalanköy (Holmivka) köyünde yaşay, 18 yaşında, bala bağçasınıñ terbiyecisi, pedagogika kolleciniñ mezun kursınıñ talebesi.

Yaqalanğan bütün qadınlarğa “Rusiye Federatsiyasınıñ qanunlarına köre terroristik olaraq tanılğan teşkilâtnı teşkil etüvde ve onıñ faaliyetinde iştirak etüv”de sahte qabaatlavlar qoyuldı ve olarnı orta küz ayınıñ 16-nda olacaq mahkeme oturışlarına qadar apiste qaldırdılar.

İşğal etilgen Qırımda yüzlernen buña oşağan vaziyetniñ tecribesi, Rusiye FSBsi tarafından uydurılğan terrorizm qabaatlavları mahkemeler tarafından desteklenecegini ve apiske alınğan qadın ve qızlar azatlıqtan marum qalacaqlarını köstere.

Qırımtatar Milliy Meclisiniñ Prezidiumı qırımtatar qadınlarınıñ evleriniñ kütleviy tintmeleri ve olarnıñ apis etilmelerini Rusiye işğalli akimiyeti tarafından qırımtatar halqına qarşı yapılğan ve milliy menliginiñ er angi ifadesini yoq etmek içün onıñ istegini bastırmaq maqsadınen yapılğan terror olaraq tanıy.

Qırımtatar Milliy Meclisiniñ Prezidiumı aşağıdaki adımlarğa çağıra:

• Ukrayina Prezidenti, Ukrayina Yuqarı Şurası ve Nazirler Kabinetini – qanunsız tutulğan Ukrayina vatandaşlarını qorçalamaq ve dünya toplulığınıñ diqqatını Qırımdaki Rusiye işğalli rejiminiñ nevbetteki cinayetine celp etmek içün bütün halqara-uquqiy mehanizmlerni qullanmağa,

• BMTnıñ Havfsızlıq Şurası, Avropa Şurası, OSCE, Avropa Birligi, devletlerniñ parlamentleri ve ükümetlerini – Qırımdaki Rusiye işğalcileriniñ cinayetlerini acele taqbih etip, Rusiye Federatsiyasından sahte ve siyasiy sebeplerden apiske alınğan bütün qırımtatarlar ve qavmiy ukrayinlerniñ acele azat etilmesini talap etmege,

• Türk devletleri teşkilâtınıñ aza memleketlerini – Türkiye, Azerbaycan, Qazahistan, Özbekistan, Qırğızistannı – tek türk medeniyet cemiyetiniñ bir qısmı olğan qırımtatar halqını qorçalap, onıñ tarihiy vatanı olğan Ukrayina devletiniñ ayırılmaz bir qısmı olğan Qırımnıñ işğalden azat etilmesini talap etip, Rusiye Federatsiyasından sahte ve siyasiy sebeplerden azatlıqtan marum etilgen qırımtatarlar ve qavmiy ukrayinlerniñ acele azat etilmesini qatiyen ve açıqtan talap etmege.

Qırımtatar Milliy Meclisiniñ Prezidiumı Qırımda qırımtatar qadınları ve balalarına qarşı yapılğan repressiyalar Rusiye işğalli akimiyetiniñ cenk cinayetleri olğanını ve halqara uquq boyunca cezalandırılmalı olğanını qayd ete.

Qırımtatar Milliy Meclisiniñ Prezidiumı Esma Nimetullayeva, Elviza Aliyeva, Nasiba Saidova, Fevziye Osmanova ve Rusiye işğalli akimiyeti tarafından siyasiy sebeplerden apiske alınğan bütün Qırım sakinleriniñ deral azat etilmesini talap ete.

Qırımtatar Milliy Meclisiniñ reisi

Refat Çubarov

2025 senesi orta küz ayınıñ 16-sı

Kıyiv ş.