Zaur Smirnov: Ukraina Prezidenti yanındaki Keñeşte qırımtatarlarnı yalıñız halq tarafından saylanğan insanlar temsil etmek kerekler

06 Fevral 2014

Meclis reisiniñ muavini Zaur Smirnov Ukraina Prezidenti yanındaki qırımtatar halqı vekilleri keñeşiniñ erkânı bugünki alında qırımtatar halqınıñ yerleşmesi içün iç bir türlü fayda ketirmedi ve ketirmeycek.

Bu aqta Meclis reisiniñ muavini ATR telekanalınıñ Ukraina Prezidenti yanındaki qırımtatar halqı vekilleri keñeşiniñ yıllıq işi boyunca sualine cevap berirken ayttı. Onıñ fikrince Ukraina Prezidenti yanındaki Keñeşte qırımtatarlarnı yalıñız halq tarafından saylanğan insanlar temsil etmek kerekler

“Şahsen Ukraina Prezidenti bu keñeşniñ erkânı ile iç bir kere körüşmedi. Bunıñ sebeplerinden biri ise, zanımca, o, şunı bile ki Meclisniñ iştirakisiz semereli iş olmaz”, – dedi Zaur Smirnov.

Keñeş faaliyetiniñ yekâne “neticesi” olaraq Zaur Smirnov sürgün etilgen vatandaşlarnıñ yerleşmesine devlet bücetinden 5 million grivnâ ayırılmasını kösterdi.

“Zanımca, Keñeşniñ programmanı finansirlev semereligini arttırmaqnıñ zarurlığını añlağan azaları bu erkândan çıqmaq ya da 2010 senesi formatındaki keñeşniñ meydanğa ketirilmesi teşebbüsini ögge sürmek kerekler”, – dep saya Smirnov.

Hatırlatamız ki, Ukraina Prezidenti yanındaki qırımtatar halqı vekilleri keñeşi 1999 senesi mayıs ayında Ukraina Prezidenti L. Kuçmanıñ Fermanı ile Qırımtatar halqı Meclisini qanunlaştıruv şekili olaraq qurulğan edi. Onıñ erkânına avtomatik sürette Qurultay tarafından saylanğan Meclisniñ 33 azası kirip, reisi olaraq ise Meclis reisi tayinlendi. 2010 senesi Ukraina Prezidentiniñ Fermanına köre Ukraina Prezidenti yanındaki qırımtatar halqı vekilleri keñeşini şekillendirüv printsipi deñiştirildi.