Zaur Smirnov: Qırımtatarlar Noman Çelebicihan öldürilmesiniñ 96 yıllığı munasebetinen ötkerilecek mitingniñ yerini deñiştirmeycekler

18 Fevral 2014

Meclis reisiniñ muavini Zaur Smirnov “15 minut” internet neşirine bergen izaatında qırımtatarlar bu sefer keçken seferkisi kibi miting keçirüv yerini deñiştirmeyceklerini bildirdi.

“Mitingni Aqmescitniñ merkeziy meydanında keçirmek qararımıznı biz fevral 11-de Qırım baş naziri, uquqoruv idareleri, şeer yolbaşçısı Ageyev ile körüşüvde seslendirgen edik. Degenim kibi bir miting olacaq”, – dedi Z. Smirnov.

Smirnovnıñ söylegenine köre, qırımtatarlar mitingde keçken toplaşuvlarında bildirgen talaplarnı ögge sürecekler. Yani qan tökülmesi ve diktatura qurulmasını toqtatmaq, qırımtatar halqınıñ aqlarını ğayrıdan tiklemek, devletniñ milliy bütünligini saqlap qalmaq.

Hatırlatamız ki, fevral 23 künü saat 13.00-de Aqmescitniñ merkeziy meydanında Qırım Halq cumhuriyetiniñ birinci reisi, Qırım musulmanlarınıñ müftiyi Noman Çelebicihannıñ vahşiyane öldürilüviniñ 96 yıllığı munasebetinen miting keçirilecek. Bundan da ğayrı Qırımda Noman Çelebicihan hatırasına bağışlanğan bir sıra diger tedbirler de ötkerilecek.