Zaur Smirnov: Bizim vazifemiz faaliyetimizniñ semeresini kötermek, işimizge ise halq qıymet keser

23 Dekabr 2013

Dekabr 22 künü Meclis yolbaşçıları ve idare reberleriniñ Sudaq regionından saylanğan Qurultay delegatları, yerli milliy idare organları reberleri, yerli şuralarnıñ deputatları ve musulman cemiyetleriniñ reislerinen toplaşuvı olıp keçti.

Toplaşuvda Meclis yolbaşçıları ve idare reberleri Zaur Smirnov, Ayder Acimambetov, Seydamet Yağyayev, Emine Avamileva, Meclis reisiniñ muavini Ahtem Çiygoz, Meclis azaları Dinara Seytgaziyeva, Şevket Kaybulayev, Gülnara Bekirova, Qurultay Teftiş komissiyasınıñ reisi Ali Özenbaş, Aluşta regional meclis reisi Enver Arpatlı, Sudaq regional meclis reisi İlver Ametov ve Sudaq şeer şurası milletlerara munasebetler bölüginiñ başı Ruslan Emiraliyev iştirak ettiler.

Toplaşuvnıñ başında Meclis reisi Refat Çubarov toplaşuv iştirakçileri – milliy idare organları reisleri ve azalarına hıtap eterek, qayd etti ki işke mesülietli yanaşmadan ve daimiy alâqa qurmadan semereli faaliyet köstermekniñ imkânı yoqtır. “Er bir yerli meclis qırımtatar milliy qurumınıñ temeli ve terkibiy qısmıdır”, dedi R. Çubarov.

Meclis yolbaşçıları ve idare reberlerini taqdim eterek Refat Çubarov Sudaq regional meclis reisi İlver Ametovğa Meclisniñ er bir bölüginen bağ qurmaq içün mesülietli şahıslarnı tayinlemekni tevsiye etti. Toplaşuvda Meclis idare ve hızmetleri işiniñ hususiyetleri qayd etilip, bulardan bazıları vekâletli organda birinci kere qurulğanı da aytıldı.

Meclis reisiniñ muavini, İdare reberi Zaur Smirnov yerli meclisler öz işine mesülietli yanaşmaları kerekligini qayd etip: “Bizim vazifemiz faaliyetimizniñ semeresini kötermek, işimizge ise halq qıymet keser”, dedi.

“Qırımnıñ regionlarında meclislerniñ faaliyetini aktivleştirüv boyunca teklifleriñizni bekleymiz. – dedi Meclis reisiniñ muavini Ahtem Çiygoz ve toplaşuv iştirakçileriniñ diqqatını Meclis endi dekabr 10 künü qırımtatar halqı sürgünliginiñ 70 yıllığına bağışlanğan umumqırım siyasiy-içtimaiy tedbirlerni başlağanı aqqında ilân etkenini bildirdi.

Bundan da ğayrı Meclis idareleriniñ reberleri regional ve yerli meclislerge semetdeşler ögünde esabat bermek şekillerini közde tutmaq, öz toplaşuvlarına yerli akimiyet vekillerini de davet etmekni tevsiye ettiler. Çünki bu bir çoq meselelerniñ müsbet çezimini teminler.

Öz tarafından Sudaq regional meclis reisi İlver Ametov kündelik işni mükemmelleştirüvde bu toplaşuvnıñ büyük faydasını qayd eterek, regional meclis yerlerde pek faal çalışqanını da söyledi. Cümleden, Ayserez yerli meclisniñ reisi Zarema Emiraliyeva 1944 senesi mayıs 19 qurbanları hatırasına köyde hatıra taşı qoymaq aqqında köy şurasına ariza bergen. “Birlikteki areketlerimiz sayesinde Toqluq köyünde cami qurdıq, Taraqtaştaki camini tamir ettik, – dedi İlver Ametov.

Hatırlatamız ki, nevbetteki kenişletilgen toplaşuv dekabr 26 künü Aqyarda ötkerilecek.