Zaur Smirnov: Biz em Ukraina ükümeti, em Prezidentniñ Avropa integratsiyasına doğru areketlerine qoltutmağa azırmız

21 Noyabr 2013

Meclis reisiniñ muavini Meclis yolbaşçılarınıñ diplomatik missiyalar ve Ukrainada akkreditatsiya etilgen halqara teşkilât yolbaşçıları ile eryıllıq 3-nci körüşüvinde Ukrainanıñ Avropa integratsiyasına taba yönelişine qoltutqanını bildirdi.

“İlk-evelâ men şunı qayd etmek isterdim ki, biz Qırımtatar halqınıñ Meclisi olaraq, halq olaraq Ukrainanıñ Avropa Birliginen birleşme aqqında añlaşma imzalanması etrafındaki vaqialar içün Ukraina ile birlikte qasevet etemiz”, – dedi Meclis reisiniñ muavini, Meclisniñ milliy idare organları, QMC devlet icra akimiyeti, yerli idare organları ve bütün seviyelerdeki şuralarnıñ deputatları ile iş boyunca idareniñ başı Zaur Smirnov. – “Qırımtatar halqınıñ Meclisi Ukrainanıñ Avropa integratsiyası yönelişi ve demokratik tedbirler tarafdarı olaraq, mezkür leyhanıñ kerçekleşmesine daima qoltuttı”.

“Qırımtatar meselesine kelsek, biz Avropa komissarı Aqmescitte sentâbr 19 künü taqdim ettigi yol haritasınıñ – em Halqara forum keçirilmesine dair qısmı, em akimiyet ile dialog, biz buña azırmız, qısmına, em milliy idare organlarımıznı inkişaf ettirüvge dair qısmını amelge keçirmege azırmız. Tabiiy ki, qırımtatar halqı sürgünliginiñ 70 yıllığı arfesinde onıñ aqlarını ğayrıdan tiklegen qanunnıñ qabul etilmesine ümüdimiz büyük. Men bellesem, bu meseleni muzakere etmekniñ bile aceti yoqtır, bunda iç bir türlü siyaset yoq”.

Hatırlatamız ki, 2013 senesi noyabr 21 künü Kiyevde Meclis yolbaşçılarınıñ diplomatik missiyalar ve Ukrainada akkreditatsiya etilgen halqara teşkilât yolbaşçıları ile eryıllıq 3-nci körüşüvi olıp keçti.

Körüşüvde çet devlet elçilikleri, BMT, Avropa Birligi kibi halqara teşkilâtlar, Migratsiya boyunca halqara teşkilâtnıñ Ukrainadaki temsilciligi, BMT aliy komissarı idaresiniñ Beyazrusiye, Moldova ve Ukraina boyunca temsilciliginiñ 30-dan ziyade vekilleri,

Körüşüvniñ resmiy teşkilâtçısı “Qırım inkişafı fondı” hayriye teşkilâtı, ortağı ise “Qırım Halqara Biznes Birleşmesi” oldılar.