Zair Smedlâyevniñ işi bönüca mahkeme bitti

07 Fevral 2012

Qırımtatar halqı Meclisi Kâtibiyetiniñ başı Zair Smedlâyevnıñ işi boyunca 14 ay devam etken mahkeme keçken afta soñuna çıqtı. Şunı hatırlatmalı ki, Z. Smedlâyev bir gruppa ile beraber cemaat tertibini bozğanında(293-nci madde) ve uquqqoruv organlarınıñ işine keder etkeninde (Cinaiy kodeks 28-nci maddesiniñ 1-nci qısmı, 342-nci maddesiniñ 2-nci qısmı) qabaatlanğan edi. “Avdet” gazetasına belli olğanına köre Aqmescit şeeriniñ Jeleznodorojnıy rayon mahkemesi Z.Smedlâyevni yuqarıda qayd etilgen cinayette qabaatlı tanıp, Ukraina cinayi Kodeksiniñ 293-nci maddesi boyunca 4 ayğa ve 28-nci maddesiniñ 1-nci qısmı, 342nci maddesiniñ 2-nci qısmı boyunca 5 ayğa qapatmaq cezasını belgilegen edi. Amma Smedlâyev kendisini qabaatlı, dep saymadı. Qırımtatar halqı Meclisi Kâtibiyetiniñ başı bildirgenine köre mahkeme Smedlâyevniñ reddiyesine cevapkârlıqtan qaçınmaq istegi sıfatında qıymet kesti, bunıñ kibi de şaatlarnıñ sözlerini de tenqidge alıp, qorçalayıcı ve qabaatlanıcınıñ delillerini qabul etmedi.

Bu işni yapqanı içün cevapkırlâqqa çekmek müddetiniñ endi çoqtan keçkeni sebebinden Zair Smedlâyevni cezadan azat ettiler. Şeerden başqa yerge ketmek yasağı kibi cezanı lâğv ettiler. Mahkeme Zair Smedlâyevten Sergey Çigrin faydasına 120 grivnâ, Qırım Muhtar Cumhuriyeti Apellâtsiya mahkemesi faydasına 2057 grivnâ 98 kapik tölemekni belgiledi.

Smedlâyevniñ özü ise mahkeme qararınen razı olmağanını ve apellâtsiya davasınen çıqacağını bildirdi.
Şunı qayd etmek kerek ki, 2006 senesi iyün 22 künü Zair Smedlâyev Qırım Muhtar Cumhuriyeti Apellâtsiya mahkemesi Aqmescitteki “Kotton” klubındaki qavğa iştirakçileriniñ işi baqılğan vaqıtta bina yanında bulundı. Resmiy versiya ve qabaatlav beyanatqa köre Zair Smedlâyev bina yanında tahminen 500 qırımtatarı iştirak etken mitingge yetekçilik yapqan.

Akem vekili mahkeme zalında yer qalmağanını manaçıq etip başqa iç bir kimse, şu cümleden suçlanıcılar K.S Abdullayev., L.L Malayev., F.F Seythalilov., S.Ş Hayredinov., E.İ Kurtametovnıñ ana-babaları da kirsetilmeycegini ilân etkende miting iştirakçileri arasında narazılıq qozğadı. Neticede zal içine kirmek areketleri de yapıldı. Jeleznodorojnıy rayon militsiyasınıñ 10 hadimi olarnıñ yolunı kestiler. Smedlâyevniñ aytqanına köre, uquqqoruv organlarınıñ hadimleri qanunğa zıt areketlerni qullanıp, Qırım Yuqarı Şurası ve rayon şurasınıñ deputatlarına öz faaliyetlerini köstermelerine mania oldılar. Neticede uquqkoruv organları ve mahkeme binasınıñ qarşısında toplanğanlar arasında toqnaşuv yüz berdi. Aqibette uquqqoruv organlarınıñ hadimleri zarar kördiler.