Zair Smedlâyev Qırımtatar halqı Qurultayınıñ delegatlarını saylav boyunca Merkeziy Saylav komissiyasınıñ başı olaraq saylandı

13 January 2013

2013 senesi yanvar 12 künü Aqmescitte ötkerilgen Qırımtatar halqı V çağırılış Qurultayınıñ beşinci sessiyasında “Qırımtatar halqı Qurultayınıñ delegatlarını saylav nizamı” madde-maddenen muzakere olundı ve tasdiqlandı.

Belli ki, Qırımtatar halqı V çağırılış Qurultayınıñ dörtünci sessiyasında (2012 senesi iyül 21-22) milliy areketniñ körümli iştirakçilerinden biri Remzi Ablayev reisliginde Merkeziy saylav komissiyasınıñ erkânı tizilgen edi.

Amma sağlığı fenalaşqanı sebebinden Remzi Ablayev reis vazifesini eda etip olamadı ve soñki aylarda komissiya toplaşuvlarını reissiz keçirdi.

“Qırımtatar halqı Qurultayınıñ delegatlarını saylav nizamı” muzakere etüv ve komissiya azalarınıñ vekâletliklerini belgilev devamında evel tertip etilgen komissiya erkânından çıqmaq qararını aldılar, çünki aks alda olarnıñ Qurultayğa delegat olaraq saylanmağa aqları olmaz edi.

Bu munasebetnen Qurultay delegatları Merkeziy Saylav komissiyasınıñ 17 azadan ibaret yañı erkânını tekmillep, ayrıca rey berüv yolunen komissiyanıñ reisi etip Zair Smedlâyev sayladılar.