Zair Smedlâyev: «Milliy bayraq künü aytqan sözlerimden vazgeçmeyim»

01 July 2013

İyül 1 künü Meclis Kâtibiyetiniñ başı Zair Smedlâyevni Ukraina Telükesizligi hızmetiniñ Qırımdaki Baş idaresine çağırdılar. Buña onıñ Bayraq bayramında Qırımtatar milliy bayrağı devlet timsalidir, degen sözleri sebep oldı.

UTHge çağırılmasınıñ sebebi añlatqan Zair Smedlâyev böyle dedi: “bes-belli bunıñ sebebi Bayraq bayramı künü men milliy añı olmağan vazifedar şahıslar onı qayd ettirmemek içün er şeyni yaparlar degen izaatımdır. Bu finansirlev meselesinen bağlı”. “Bayraq – bu devletçilik belgisidir. Bizim devletçiligimiz olğanını istemegenler ise añlaşıla ki böyle tedbirlerge destek bermezler”.

Zair Smedlâyev şunı da qayd etti ki, eger onıñ sözlerinde havf körseler, öz noqtai nazarını añlatmağa azır.

“Bu menim siyasiy faaliyetimnen bağlı, dep sayam. Men Qırım akimiyeti, baş naziri, qırımtatarlar sırasından faaliyetleri halqımıznı parçalamağa çalışqan bazı çinovniklerni sıqça tenqid etem. Tabiiy ki, kimdir bunı begenmey. Siyasiy sımarış olğanı ap-açıq körüle”, – dedi Smedlâyev ve “aytqan sözlerimden vazgeçmem”, dep qayd etti.

Aman-aman bir saat devam etken sorğudan soñ Zair Smedlâyev qısqadan izaatladı: “Dedigim kibi, bayraq künü devletçilik ve bayraq aqqındaki sözlerim sebepçi eken. Meni Ukraina Cinaiy kodeksinen tanış ettiler yani men devlet qurumını zorbalı usulnen deñiştirmege ya da akimiyetni tutıp almağa çağıra ekenim.

Menim izaatlarımnıñ angi yerinde bu şeyler olğanını köstermelerini rica etkenimde iç bir türlü delil ketirip olamadılar, – dedi Smedlâyev ve qırımtatar halqınıñ milliy areketi Qırımğa qaytarılmamıznı zorluqsız usullarnen etti, devletçiligimizni de aynı bu yolnen ğayrıdan tiklermiz, diye tekrar qayd etti.

Zair Smedlâyev Ukraina Telükesizligi hızmeti hadimleri onı devlet qurumını deñiştirmek ya da ükümetni elge keçirmege doğrultılğan areketlerge yol bermemesi ve bu areketleri içün cinaiy cevapkârlıqqa çekile bilinecegi aqqında tenbiyelegenlerini bildirdi.