Zair Smedlâyev: «Mamut Sultan territorial komissiyasında iç bir türlü dava yoqtır»

16 Mart 2012

Al-azırda Qırımnıñ dört regionında yerli meclislerge saylavlar kete. Aqmescit rayonında yerli meclislerge namzetlerni kösterüv yekünlengen olsa, Aqmeçitte devam eite, Aluşta ve Yalta regionlarında ise başlandı. 

Maalliy meclislerge saylavlarnı azırlav ve teşkilâtlandıruv boyunca komissiyanıñ kâtibi Zair Smedlâyev Saylav ceryanınıñ ketişatına izaat bere. 

“Bugünde-bugün Maalliy meclislerge saylavlarnı azırlav ve teşkilâtlandıruv boyunca komissiyası yerli territorial saylav komissiyalarından protokollarnı qabul ete”, – dedi Zair Smedlâyev. Endi bu regiondan yerli meclisler azalığına namzetligini köstergenler kendileriniñ saylav kampaniyalarını teşkil etip, öz planları, bu vaqıtqa qadar yapqan faaliyetleri aqqında ikâye etecekler. Bunı esasen yerli territorial saylav komissiyaları ya da Maalliy meclislerge saylavlarnı azırlav ve teşkilâtlandıruv boyunca komissiyası degil de namzetlerniñ özleri yapmaq kerekler.

Saylav ceryanınıñ ketişatınen Maalliy meclislerge saylavlarnı azırlav ve teşkilâtlandıruv boyunca komissiya kütleviy matbuat vastalarında , televizion programmalarda muntazam sürette tanış eteler. 

“Keçenlerde ATR telekanalı Mamut Sultan territorial komissiyasında dava çıqqanı aqkqında haber berdi. Kesinliknen qayd etem, anda iç bir türlü dava yoqtır. Ebet farqlı fikirler bildirildi, bu tabiiy bir al. Reqabet olğan yerde fikirler de çeşit olabilir. Eger yerli territorital komissiyalar bir hulâsağa kelip olamasalar, o zaman Maalliy meclislerge saylavlarnı azırlav ve teşkilâtlandıruv boyunca komissiyası, davanı çezüvde yardımğa kele, – dedi Zair Smedlâyev. Bunıñ kibi o şunı da qayd etti ki, Maalliy meclislerge saylavlarnı azırlav ve teşkilâtlandıruv boyunca merkeziy komissiya yerli komissiyalarnıñ erkânını öyle şekillendire ki, oña çeşit cemaat teşkilâtlarınıñ vekilleri de kirsetilsin. Bu öz nevbetinde doğru ve adaletli saylavlarnıñ keçirilmesini teminler. 
“İş grafigi ve territorial komissiyalarnıñ bulunğan yeri aqqında ilânlar cemaat yerlerinde, “Avdet” gazetası ve Qırımtatar halqı Meclisiniñ İnternet saifesinde yerleştirildi”, – dep haber etti Zair Smedlâyev ve yaqın vaqıtta er bir qırımtatar ailesine yerli meclislerge saylavlarda iştirak etmek içün davetnameler yollanılacağını bildirdi.