Menu 
Yürekten – yürekke!
06 Yanvar 2012
10 yıl devamında “Maarifçi” birleşmesi Qırımda AQŞtatlarnıñ ARD hayriye fondunen işbirlikte “Yürekten – yürekke” leyhası çerçivesinde faaliyet köstermekte.
Maarifçiler ARDi tarafından ketirilgen yardımlarnı mektep, bala bahçalarına, internat, saqatlar evi ve cemaat teşkilâtlarına yetkizeler.
Milliy Meclis medeniyet ve tasil idaresiniñ müdiri, “Maarifçi” birleşmesiniñ reisi Safure Kacametova – Qırım Yuqarı Şurasınıñ deputatı olaraq, Yılbaş arfesi em de Yañı yılnıñ ilk afta künleri Qırımnıñ bir sıra bala bağçaları, mekteplerini ziyaret etip, tasil hadimlerinen körüşti ve olarnıñ al-evalı, faaliyeti ve oquv müessiseleriniñ problemlemli meselelerinen yaqından tanış oldı. O, er bir köterilgen meseleni diqqatnen diñlep, elinden kelgenince yardım etecegini bildirdi.
Safure Kacametova er bir bulunğan bağça-mektepte QYUŞurası tarafından 20.10.2010 senesi qabul etilgen ” QMCumhuriyetinde qırımtatar tilinde tasil köntseptsiyası” esasında devlet programması qabul etilgence, er kes mesülietli emeginen milliy tasilimizni ileri inkişafına issesini qoşacağına işanç bildirdi ve tasil hadimlerini Yañı Yılnen hayırlap, aman-esenlikler em de maarif faaliyetlerinde yüksek neticelerge irişmelerini tiledi.
O, er barğan oquv müessise pedagogika kollektiviniñ oca ve terbiyecilerine hayriye yardımı alıp bardı em de bu iş devam etilecegi, kelecekte işbirlik munasebetleri üzülmeycegini qayd etti.
Yaş nesilniñ terbiyesi, bala bağçalarınıñ ve mekteplerniñ muhtacları aqqında alıp barılğan subet-körüşuvlernıñ soñunda, er bir yerde – müdirler, terbiyeciler ve ocalar QYUŞñ deputatı Safure Kacametovağa ve ARD hayriye fonduna ayırılğan diqqat ve yapılğan yardımlar içün teşekkür bildirdiler.
