YÜNESKO Qırımda medeniy ve tabiiy asabalıq yadikârlıqlarını tedqiq ete

04 Iyün 2011

Mayıs 18-den itibaren YÜNESKO – Birleşken Milletler Teşkilâtınıñ tasil, ilim ve medeniyet meseleleri boyunca yetekçi mütehassısı professor Bernd fon Droste Ukrainada iş ziyaretinen bulunmaqta. YÜNESKO faaliyetleri saasında halqara seviyede itibar qazanğan, daa yaqın keçmişte YÜNESKO yanında Bütündünya asabalıq merkeziniñ direktorı vazifesinde çalışqan Bernd fon Droste cenapnıñ Ukrainağa ziyaretiniñ baş maqsadı Qırımda bütün insaniyet içün qıymetli olğan medeniy ve tabiiy asabalıq yadikârlıqlarını ögrenmektir.

Professornıñ esas diqqatını birinci nevbette Bağçasaraydaki Hansaray ve Aqyardaki Hersones celp etmekte.

Qırım boylap yapqan iş seferinde professor Bernd fon Drosteniñ yanında ukrain alimleri – Ukraina Medeniyet ve turizm nazirligi yadikârlıqlarnı qorçalav ilmiy-tedqiqat institutı direktorınıñ ilmiy işler boyunca muavini, tarih ilimleri namzeti Timur Bobrovskiy, mimarlıq ve şeer qurucılığı, ilim ve tehnikiy nesnelerni tedqiq etüv bölüginiñ müdiri, mimarlıq namzeti Valeriya İyevleva ve arheologik asabalıqnı qoruv bölüginiñ başı Ruslan Osadçiy bulunmaqtalar.

2011 senesi iyün 4-te professor Bernd fon Droste qırımtatar saray mimarlığınıñ saqlanıp qalğan yekâne yadikârlığı Hansarayda Qırımtatar halqı Meclisi reisiniñ birinci muavini, Bütündünya qırımtatar kongressiniñ prezidenti Refat Çubarov ve Meclisniñ tışqı alâqalar bölüginiñ rehberi Ali Hamzin ile körüşti. Körüşüv iştirakçileri Hansaraynıñ bugünki vaziyetini muzakere etip, bu unikal tarihiy yadikârlıqnı saqlav ve kütleviyleştirüv boyunca körülecek çare-tedbirler aqqında fikir paylaştılar.

Aynı şu künü professor Bernd fon Droste ve onıñ ile beraber bulunğan ukrain zenaatdaşları Milliy Meclis reisi, Ukraina halq deputatı Mustafa Cemilev ve Bağçasaray rayon devlet memuriyetiniñ başı İlmi Ümerovnen körüştiler. Bağçasaray tarihiy-medeniy zapovednikniñ baş direktorı Yevgeniy Petrov, onıñ muavini Öleksa Gayvoronskiy, Milliy Meclis reisiniñ birinci muavini Refat Çubarov, Milliy Meclis tışqı alâqalar bölüginiñ başı Ali Hamzin de iştirak etken körüşüv devamında qırımtatar halqınıñ qaytuvı, yerleşüvi ve uquqlarınıñ ğayrıdan tiklenüvi ile bağlı problem ve meseleler boyunca fikirler bildirildi.

Körüşüvniñ neticelerine yekün çekerek Mustafa Cemilev ürmetli musafirge Qırımnıñ medeniy ve tabiiy yadikârlıqlarını ögrenüv saasındaki tekdqiqatları içün minnetdarlıq ifade etip, Hansaray YÜNESKO Bütündünya asabalıq nesneleriniñ cedveline kirsetilecegine ümüt bildirdi.
Professor Bernd fon Drosteniñ Qırımğa iş ziyareti Ukraina ve Avropa Birligi arasındaki emekdaşlıq programması çerçivesinde Avropa Birliginiñ Ukrainada vekâletliginiñ qoltutuvında teşkilâtlandırıldı. Mezkür programmada Qırım Avropa Birligi ve Ukraina arasındaki emekdaşlıqnı kenişletici leyha rolüni eda etecek.