Menu 
YÜNESKO eksperti Qırımda medeniyet ve tabiat yadikârlıqlarını ögrenüv programması çerçivesinde Eski Qırım ve Kezlevni de ziyaret etti
08 Iyün 2011
Eski Qırımda professor Qırımnıñ eñ eski, 1287-1288 seneleri qurulğan Sultan Beybars camisiniñ saqlanıp qalğan isarlarını, Özbek han camisiniñ yeri ve yanındaki, 1314 senesi tiklengen, medreseniñ yıqıntılarını, bunıñ kibi de temeli on dörtünci asırda qoyulğan Qurşun caminıñ qalımtılarını baqıp çıqtı.
Şu künniñ ekinci yarısında professor Bernd fon Droste Kezlevge kelip çıqtı ve Cuma cami, karaim kenasse, Dervişler tekiyesi ve Odunbazar qapısını közden keçirdi.
Bundan da ğayrı, professor Bernd fon Droste içün Kezlevniñ çeşit dinlerniñ ibadethaneleri yerleşken eski qısmı boyunca kezinti teşkilâtlandırıldı.
Professornıñ iş seferi vaqtında onıñ yanında Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov, Milliy Meclis tışqı alâqalar bölüginiñ başı Ali Hamzin, professornıñ yardımcısı, mimarcılıq namzeti Rikardo Şmidt ve Qırım müendslik-pelagogika universiteti tarih kafedrasınıñ ocası, arheolog Emil Seydaliyev bulundılar.
