«Yıl ocası – 2012»

24 Fevral 2012

Fevral ayında Qırım Tasil ve ilim, gençlik ve sport nazirliginiñ emirine muvafıq ananeviy “Yıl ocası” yarışı keçirilmekte. Öz regionlarında ğalip çıqqan ocalar eyyet avalesine ders ve mektepten tış tedbirler işlenmeleri, öz tecribesi, maqalelerini yollaylar.

Bu sene yarışqa 11 regiondan ğalipler öz işlerini taqdim ettiler. 2012 senesi fevral 16 künü Qırım cumhuriyeti diplomdan soñ tasil institutına akemler eyyeti ve yarış iştirakçileri davet olundılar. 11 namzetten yarışnıñ soñki basqıçına 6-sı seçilmesi kerek. Mu sene seçim basqıçına deñişmeler kirsetildi. Namzetlerge psihologiya, pedagogika, fen usuliyeti boyunca 10 sualge yazma şekilde cevap bermek teklif etildi Bundan da ğayrı ocalarnıñ umumiy dünyabaqışına da qıymet kesildi.

Yazma cevaplar ve testler berilgen eki saat içinde akemler yarışçılarnıñ özlerinen beraber ketirgen malzemelerini közden keçirdiler. Soñunda seçim basqıçınıñ neticeleri ilân etildi: 11 namzetten aşağıdaki 6 adam keçti:

– Mustafayeva Elzara Bahtiyorovna – Curçı rayon Aybar umumtasil mektebi;

– Seitablayeva Lemara Talâtovna – 1 –nci gimnaziya Aqmescit ş;

– Seymanova Niyara Abibullayevna – Aqmescit rayonı Çistenkoye oqutuv-terbiyelev müessisesi;

– Tinçirova Mayre Resimovna – Canköy rayonı Haqlay umumtasil mektebi;

– Teyfuk Elvina Anafiyevna – Saq şeerindeki 2-nci umumtasil mektep;

– İsmailova Lenara Ablatifovna – Qurman rayonı Klimovskoye umumtasil mektebi.

21-22 fevral künleri 6 namzet ve Qırım tasil nazirliginiñ qırımtatar tilinde tasil sektorınıñ müdiri Suleymanova Zarema Seyyarovnanıñ reberliginde 5 eyyet azası Lenin rayonınıñ Qıdırlez köyüne bardılar. “Yıl ocası – 2012” Bütünukrain yarışınıñ “Qırımtatar tili” nominatsiyası işte anda ötkerildi.

Musafirlerni mektep direktorı Seydametova Zeynep Serverovna reberliginde kollektiv sıcaq qarşılap aldı. Yarışqa Qırımtatar halqı Meclisiniñ azaları, Qırım Yuqarı Şurasınıñ deputatları Refat Çubarov ve Safure Kacametova yaqından qoltutqanları, yarışqa kütleviy matbuat vastalarını celp etkenleri sayesinde o yüksek seviyede ötkerildi. Safure oca Kacametova, ocalar içün eñ qıymetli bahşış kitap olğanını bilerek, er bir namzetke ve eyyet azasına luğat, oquv qullanmalarını ediye etti.

Yarış teşkilâtçılarınıñ kütüphanesine de derslikler ve bediiy kitaplar berildi.

Yarışnıñ neticelerine yekün çekilip, ğalipler belgilendi:

1-nci yerni Canköy rayonı Haqlay umumtasil mektebiniñ ocası Tinçirova Mayre Resimovna;

2-nci yerni Saq şeerindeki 2-nci umumtasil mektep ocası Teyfuq Elvina Anafiyevna;

3-nci yerni – Curçı rayon Aybar umumtasil mektebiniñ ocası Mustafayeva Elzara Bahtiyorovna qazandılar.

Yarışta qatılğanlarnıñ ekseriyeti yaş ocalar olğanı eyyet azalarını ğayet sevindirdi. “Qırımtatar tiliniñ ve balalarımıznıñ kelecegi böyle istidatlı ocalarnıñ elinde. İstidatlı, işine icadiy yanaşqan ocalar ana tiline sevgi aşlaya bilir, onıñ qorçalanmasını teminler” , – dep qayd ettiler eyyet azaları.