Yedi Quyu regional meclisiniñ reisi olaraq Lenur Ablâzimov saylandı

21 Dekabr 2013

Qırımtatar halqı Meclisiniñ 2013 s. Dekabr 6-da alınğan № 06 “Yedi Quyu(Lenin) regional konferentsiyası aqqında” qararı eda etilerek dekabr 21 künü Yedi Quyu regional meclis reisini saylav boyunca regional konferentsiyası ötkerildi.

Qurultay Merkeziy saylav komissiyasınıñ reisi Zair Smedlâyev alıp barğan konferentsiyanıñ işinde 24 yerli meclisni temsil etken 93 delegat iştirak etti.

Konferentsiyada Qırımtatar halqı Meclisiniñ reisi Refat Çubarov, onıñ muavinleri Zaur Smirnov ve Ayder Acimambetov, Meclisniñ idare yolbaşçıları Emine Avamileva ve Seydamet Yağyayev, Qurultay Teftiş komissiyasınıñ reisi Ali Özenbaş, Meclis azası Gülnara Bekirova, Aluşta regional meclis reisi Enver Arpatlı, Lenin ve Keriç bölgesinden saylanğan Qurultay delegatları ve regionnıñ qartları iştirak ettiler.

Konferentsiya delegatları tarafından tasdiqlanğan kün tertibini muzakere etüv devamında Yedi quyu regionı milliy idare organınıñ yolbaşçısı vazifesine İbraim Bormambetov ve Lenur Ablâzimovnıñ namzetleri kösterildi. Namzetlerniñ ekisi de konferentsiya delegatları ögünde çıqışta bulunıp, berilgen suallerge tafsilâtlı cevap qaytardılar.

Regional meclis reisini saylav boyunca esap komissiyasınıñ reisi Venera Fazılova esap komissiya toplaşuvınıñ qararını seslendirip, konferentsiya delegatlarını bülleten blankı, gizli rey berüv tertibinen tanış etti.

Gizli rey berüv neticeleri boyunca konferentsiyanıñ 50 delegatı Lenur Ablâzimov, 43-i ise İbraim Bormambetovnıñ namzetine qoltuttılar. Böyleliknen, rey berüv neticelerine köre Yedi Quyu regional meclisiniñ reisi olaraq Lenur Ablâzimov saylandı.

Merkeziy saylav komissiyasınıñ reisi Zair Smedlâyev konferentsiya delegatlarına şunı hatırlattı ki, “Qırımtatar halqı milliy idare organları aqqında nizam”ğa binaen 24 yerli meclis reisleri avtomatik sürette Yedi quyu regional meclisniñ azaları olalar, regional meclisniñ reisi ise regional meclis erkânına yerli meclislerniñ umumiy sayısından 1/3 namzetlerni qoşmağa aqqı bar.

Böyleliknen regional meclisniñ yañı reisi Lenur Ablâzimovnıñ teklifi boyunca regional meclis erkânına 7 aza, şu cümleden İbraim Bormambetov ve sabıq reisi Elvira Akimova da kirsetildiler.

Yedi quyu regional konferentsiya iştirakçileri ve yañı reiske hıtap eterek Milliy Meclis reisi Refat Çubarov ğalipni hayırladı ve iştirakçilerge yahşı teşkil etilgen saylav içün teşekkür bildirdi.

Meclis reisi regional meclisniñ yañı reisi regionda meclis faaliyetiniñ semereliligini arttıracağına ümüt bildirip, meclis azalarına ise Qurultay ve Meclisniñ qararlarına esaslanaraq semetdeşlernen daa ziyade aktiv çalışmaqnı tevsiye etti.

Malümat içün: 2012 senesi mart ayında Lenin regional meclis reisi olaraq Elvira Akimova saylandı, amma aileviy sebepler ve sağlığınıñ vaziyetine köre 2013 senesi noyabr 12 künü Elvira Akimova Milliy Mecliske ariza ile muracaat etip, onı Yedi quyu regional meclis reisi vazifesinden azat etmelerini rica etti.