Yedi Quyu regional meclisiniñ reisi olaraq Elvira Akimova saylandı

2012 senesi mart 18 künü Yedi Quyu (Lenin) rayonı qırımtatarlarınıñ konferentsiyası olıp keçti.

Konferentsiya işinde 24 maalliy meclislerni temsil etken 103 delegat, bunıñ kibi de Qurultay Teftiş komissiyası reisiniñ muavini Qurtseit Abdullayev ve Qırımtatar halqı Meclisi Kâtibiyetiniñ başı, Yerli meclislerge saylavlarnı azırlav ve keçirüv boyunca komissiyanıñ kâtibi Zair Smedlâyev iştirak ettiler.

Konferentsiyanı Yerli meclislerge saylavlarnı azırlav ve keçirüv boyunca komissiyanıñ reisi, Qırımtatar halqı Meclisi reisiniñ birinci muavini Refat Çubarov alıp bardı.

Konferentsiyanıñ kün tertibine tsç mesele qoyuldı:

1. Yedi Quyu regional meclis reisini saylav aqqında;

2. Yedi Quyu regional meclisiniñ erkânı aqqında;

3. Eski musulman mezarlıqlarınıñ vaziyeti aqqında.

Yedi Quyu regional meclis reisiniñ vazifesine Nadir Acaripov, Elvira Akimova ve Şevhi Nafeyevniñ namzetleri kösterildi. Gizli rey berüv neticeleri boyunca Yedi Quyu regional meclisiniñ reisi olaraq Elvira Akimova saylandı.

Yedi Quyu regional meclis reisiniñ teklifi boyunca Yedi Quyu regional meclisiniñ erkânına qoşumca olaraq Enver Abdulmecitov, Arsen Abilvapov, Eskender Apkelâmov, Lenur Ablâzimov, İbraim Bormambetov , Memet İsmailov, Dilâver Melgaziyev ve rayon imamı Rustem Memetov kirsetildiler.
Kün tertibiniñ üçünci meselesi boyunca konferentsiya delegatları bir ağızdan muracaat qabul ettiler.

Malümat içün:

Akimova Elvira Şevqiyevna

1970 senesi mart 24-te Andijan şeerinde 

Aliy malümatlı – Herson devlet pedagogika institutı, slavân filologiyası fakulteti (1995 g.);
– Qırım cumhuriyet diplomdan soñ tasil institutı, qırımtatar filologiyası fakulteti (2004 g.).

Al-azırda Kürpe (Kalinovka) oqutuv-terbiyelev kompleksi direktorınıñ oqutuv-terbiyelev işleri boyunca muavini olıp çalışa.

Ocalıq iş stajı – 14 yıl. Devlet hızmeti stajı – 3 yıl.

Evli. Bir qızı ve eki oğlu bar.

Haberlerge video