Yañı Yıl hayırlı olsun!

30 Dekabr 2011

Yañı Yıl hayırlı olsun!
Sayğılı semetdeşler!

Taqvimiy yıllar deñişmesi epimizge yapqan işlerimizniñ neticelerine yekün çekmek, bizim iştirakimiz ile ya da etrafımızda olğan vaqialarğa qıymet kesmek imkânını berip, soy-aqrabalarımız ve yaqınlarımıznıñ yaşayışını daa da yahşılaştırğan areketlerni yapmağa siltem ola.

Tarihke dönmekte olgan 2011 senesi qırımtatar halqı içün öz aqları içün küreşniñ daa bir basqıçı oldı. Halqımıznıñ ömürinde 2011 senesi yüz bergen bir çoq müsbet deñişmeler semetdeşlerimizniñ birligi ve faalligi, Qırımtatar halqı Meclisi, regional ve yerli meclisler, musulman cemiyetleri ve qırımtatar cemaat teşkilâtlarınıñ maqsadlı faaliyeti sayesinde oldı.

Kirip keleyatqan 2012 senesi er birimizden qırımtatar halqınıñ kelecegi, onıñ öz toprağında devletçiligini tiklemesi, Qırımda yaşağan cemi insanlarnıñ bahtlı ömüri oğrunda daa ziyade faal ve semereli areket etmekni talap ete.

Yüce Rabbimiz muqaddes Qırım ve Qırım toprağında yaşağanlarnıñ episine rahmet ve sevgi eylesin!

Qırımtatar halqınıñ Meclisi