Yañı rus qanun leyhası, Qırımnıñ sakinlerine cinaiy mobilizatsiyadan red etmek imkânını yoq ete – uquq qorçalayıcılar

13 Aprel 2023

rf devlet dumasınıñ tasdıqlağanı hızmet etmege mecbur olğan insanlarnıñ sicili aqqında qanun leyhası, vaqtınca işğal etilgen topraqlarda hızmet ete bilgen yaşta olğan eali üzerinde kontrol pekite. İşğal ordusına cinaiy mobilizatsiyadan qaçınmaq imkânını deyerli yoq ete. QırımSOSnıñ analitikacısı Yevheniy Yaroşenko bu aqqında haber berdi.

Tasdıqlanğan qanun leyhasına mücibi mobilizatsiyanamelerni elektron namelernen beraber yollaycaqlar. İşğal etilgen topraqlarda, şu cümleden Qırımda, rysiye qanun deñişmelerini qanunsız olaraq tarqatacaq. Böylece rus akimiyeti, rf ve işğal etilgen topraqlarda yaşağan hızmet ete bilgen yaştaki eali üzerinde kontrolini pekite ve rus ordusına cinaiy mobilizatsiyadan qaçınmaq imkânını deyerli yoq ete, – dep Yevhen Yaroşenko ayttı.

2023 senesi çiçek ayınıñ 11-inde aynı zamanda dört oturışta rf devlet duması, hızmet etmege mecbur olğan insanlarnıñ sicili aqqında qanun leyhasını tasdıqladı. Bugünden adiy mobilizatsiyanamelerni elektron namelernen beraber yollaycaqlar. Mobilizatsiyanamelerni imzalamaq içün yazılı şekilde poçta vastasınen ve elektron şekilde yollaycaqlar. Devlet hızmetleri saytında şahsiy kabinetinde mezkür vesiqa peyda olğan vaqıt – mobilizatsiyanameni berüv vaqtı olaraq sayılacaq. Kerçekte de demek ki, bu yañılıqlar, arbiy komissarlıqtan mobilizatsiyanameni almamaq imkânını yoq eteler.

Mobilizatsiyanamelerni alğan insanlar içün, 20 kün devamında arbiy komissarlıqqa ketmegence, rfdan çıqmaq yasaqtır. Bundan ğayrı, mezkür qanun leyhası espqa alır ki, arbiy sicilge kirsetkende şahsiy bulunuv kerekmez.

Bu yañılıq tek müddetli askerler degil, hızmet etmege mecbur olğan bütün insanlarğa aittir. Hatırlatamız ki, halqara gumanitar uquqlarnıñ qaidelerine baqmadan işğal etilgen topraqlarda, şu cümleden Qırımda, rusiye öz qanunlarını tarqata.