Yalta ve Poloniya Mişka-Tatar olaraq belli Ümer Adamanovnı hatırladılar

04 Aprel 2011

Poloniyada Ekinci dünya cenkiniñ iştirakçisi, partizan otrâdınıñ efsaneviy komandiri, Mişka Tatar adınen belli qırımlı Ümer Adamanovğa eykel qoyulğan Yüzefovo şeeriniñ burgomistri Roman Dzüra Yaltağa ziyaretnen kelip, Yalta şeeriniñ Meri Aleksey Boyarçuk ile körüşti.

Körüşüvde bunıñ kibi de Qırımtatar halqı Meclisi reisiniñ muavini, Qırım Yuqarı Şurası Milletlerara munasebetler ve sürgün etilgen grajdanlarnıñ meseleleri boyunca daimiy komissiyasınıñ başı Remzi İlyasov; Qırımtatar halqı Meclisiniñ azası, Meclis protokol hızmetiniñ başı Fevzi Qubedinov; Qırımtatar halqı Meclisiniñ azası, Yalta şeer şurası Milletlerara munasebetler ve migratsiya işleri boyunca idareniñ başı Zaur Smirnov, “Köydeşler” Qırım cemaat teşkilâtınıñ reisi İbraim Voyennıy iştirak ettiler.

Eki şeer reberleri biri-birlerine öz hududlarınıñ hususiyetlerini tarif etip, Yalta ve Yüzefovo şeerleri arasındaki bağ ve emekdaşlıqnı kenişletmek qararını aldılar. Şunı qayd etmeli ki, lehler ekologik leyhalarnı beraber amelge keçirmege isteseler, yaltalılar yalı boyuna Poloniyadan çoqça turist kelgeninde menfaatdarlar. Körüşüvniñ soñunda şeer yetekçileri biri-birine ananeviy qıymetli ediyeler bağışladılar. Poloniya delegatsiyası bunıñ kibi de efsaneviy qaraman doğğan Ay-Vasil köyünde onıñ adını taşığan soqaqnı ziyaret etti.
“IPC – Bölşaya Yalta”: Media merkeziniñ malümatı boyunca.