Kıyivde “Accı badem çiçek açqan yer…” sergisi açıldı

08.05.2025

Mayısnıñ 8-nde Kıyivde V.Ğ. Zabolotnıy adına Devlet ilmiy mimarcılıq-qurucılıq kitaphanesinde “Accı badem çiçek açqan yerde…” sergisi açıldı.

Tedbir “Qırımtatar studiyaları” halqara tasil medeniy-bediiy leyhası çerçivesinde keçirile. Qırımtatar halqınıñ genotsid fedalarıniñ hatıra kününe bağışlanğan sergi Qırımtatar ananeleri ve merasimlerinen tanış etecek oyuncaq kompozitsiyalarını, V.Ğ. Zabolotnıy adına kitaphaneniñ ve Taras Şevçenko adına KMUniñ OİFİniñ Turkşınaslıq kafedrasınıñ Qırımtatar tili ve edebiyatı merkeziniñ fondlarından neşirlerni, “Qırım Manzaraları” serisinden ressam Vitaliy Vlasükniñ resimlerini, “Yaşyış sanatı” ve “Qırım köyleri” seriyalarundan Ukrayin, Qırımtatar ve Bulğar genç ressamlarınıñ resimlerini birleştire.

Taqdimde Qırımtatar Milliy Meclisiniñ reisiniñ muavini Nariman Celâl çıqışta bulundı:

“Şuralar akimiyeti tarafından Qırımnıñ tamır halqına qarşı yapılğan deşetli genotsidniñ hatırası tek Qırımtatarlarnen degil de, yanımızda yaşağanlarnen de paylaşıla ve bunıñ kibi tedbirler kelecek aftalarda bütün Ukrayinada ve onıñ tışında keçirilecek. Bu pek müimdir, çünki Ukrayinler özleri de aynı akimiyetten Ğolodomor, ziyalılarnıñ öldürüvi ve daa çoq şeyni başından keçirdiler. Ve şimdi biz kene beraberlikte umumiy devletimizniñ serbestligi, mustaqilligi ve bütünligi oğrunda küreşemiz. Ve bugün balalar ögümizde turğanı daa da qıymetli, çünki bizim neslimiz içün olarğa hatıra, añlayış ve kelecekke baqışnı bermek pek müimdir”, – dedi o.

Tedbirniñ eñ yüksek noqtası Birlik School talebeleri ve ocaları tarafından azırlanğan “Accı badem çiçek açqan yerde…” adlı teatr numayışınıñ premyerası oldı.

“1944 senesi mayısnıñ facialı saba adiseleri, bugünki cenkniñ kerçeklerinen yaşağan balalar tarafından añlatılğan bir ikâye olaraq birleştirile”, – dep serginiñ teşkilâtçıları tarif etti.