Viktor Plakida Meclis reisini doğğan künü ile hayırladı

14 Noyabr 2011

Ukraina Prezidenti Qırımdaki Daimiy temsilcisiniñ vazifesini eda etici Viktor Plakida ve onıñ muavini İbraim Mamutov Qırımtatar halqı Meclisiniñ reisini doğğan kününen samimiy hayırladılar.

Noyabr 13 künü Meclis reisi 68 yaşını toldurdı.

Mustafa Cemilevni Meclis ofisinde hayırlağan, Viktor Plakida ve İbraim Mamutov belli siyasetçige sönmez küç-ğayret, sağlıq, bolluq ve eyilik tilediler. “Siziñ işiñizge sadıqlığıñız, tecribe ve istidatıñız ileride de Ukraina faydasına çalışsın”, – dedi Viktor Plakida.

Ukraina Prezidenti Qırımdaki Daimiy temsilcisiniñ vazifesini eda etici Viktor Plakida bundan bir kün evelsi bütün musulman dünyası Qurban bayramını qayd etkenini hatırlayaraq, Meclis reisine öz adından bir qoy bağışladı.

Şu künü Meclis ofisiniñ azbarında qurban çalınıp, eti adamlarğa tarqatıldı.