Meclis uzurında Cemaat şurasını teşkil etüv meseleleri toplaşuvı olıp keçti

13.09.2025

İlk küz ayıniñ 13-nde Kıyivde Qırımtatar Milliy Meclisi uzurında Cemaat şurasını teşkil etüv meselelerine bağışlanğan birinci toplaşuv olıp keçti.

Toplaşuvğa tahminen 30 teşkilâtnı temsil etken 70 insan (25 online ve 45 offline) qoşuldı. Toplaşuv iştirakçileri arasında qırımtatar cemaat sektorınıñ vekilleri, faalciler, göñülliler, din adamları, arbiy hızmetçiler, jurnalistler, em de Meclis azaları ve qırımtatar halqınıñ lideri Mustafa Cemilev bar edi.

Qırımtatar Milliy Meclisiniñ reisi Refat Çubarov cemaatqa Cemaat Şurasınıñ teşkil etilmesi boyunca esas mevzularnı taqdim etti, vesiqada qayd etilmek kerek olğan qaidelerge diqqat ayırdı. Şu cümleden: Şuranıñ teşkil etilmesiniñ zaruriyeti, Şuranıñ vazifeleri sırasına kirgen Şuranıñ statusı, Şuranıñ terkibiniñ şekillendirilmesi, Şura azalarınıñ aqları ve vazifeleri, Şuranıñ işi ve Qırımtatar Milliy Meclisinen işbirligi nasıl şekilde alıp barılacağı.

İştirakçilerniñ er biri kelecek Şuranıñ işi aqqında öz fikrini bildirdi. Toplaşuvda 30-dan ziyade iştirakçi çıqışta bulundı.

Bundan da ğayrı, Qırımtatar Milliy Meclisi tarafından baqılacaq ve qabul etilecek Cemiyet Şurası aqqında nizamnameniñ leyhası üzerinde işniñ nevbetteki adımları belgilendi.