VI çağırılış Qurultayı delegatlarına Meclis reisiniñ muavini Remzi İlyasov aqqında pis mektüpler kelmekte

23 Oktâbr 2013

Belli olğanına köre, Qurultay 1-nci sessiyası başlanması arfesinde Qurultay delegatlarınıñ poçta qutularına anonim mektüpler kelip başlağan.

Poçita zarfları üzerinde “Yollayıcı” degen yerde Milliy Meclis ofisi yerleşken Aqmescit şeeri Şmidt soqağı, 2 adresi kösterilmekte. Mektüp içinde ise A 4 köleminde kâğıtta Meclis reisiniñ muavini Remzi İlyasovnıñ faaliyeti aqqında sahte malümat basılğan.

Bu pis provokatsiyanı yapqanlar sessiya başlanmasına qadar yetiştirmek maqsadında öyle bir aşıqqanlar ki, “yollayıcı”nıñ adresini “alıcı”nıñ adresinen adaştırğanlar ve neticede Qurultay delegatlarına yollanılğan mektüplerni “Ukrpoçta” kene Meclis ofisine qaytarğan. Bu alçaq areket teşkilâtçılarınıñ maqsadı belli. Bes-belli “sahte verekaalar”nıñ teşkilâtçıları ve müellifleri milliy qurultay delegatları arasına şına qaqmaq, aralarını bozmaq, biri-biirine işançsızlıq duyğusını taşlamaqnı niyetlengenler.

Remzi İlyasovnıñ aytqanına köre professional faaliyeti devamında bu kibi fesatlarğa ve muhalifet tarafından qullanılğan pis tehnologiyalarğa qulaq asmamaqnı adet etken. Adette böyle areketler qırımtatar cemiyetinde emiyetli bir vaqialar arfesinde ola turğan.

“Böyle fesat men Meclis reisiniñ muavini olaraq saylandığım 2002 senesi de yapılğan edi, – dedi R. İlyasov. – O zaman Meclis reisi Mustafa Cemilev böyle alçaq areketler tek qorqaqlarnıñ qolundan kele, degen edi. Qırımda çeşit firqalar ve areketler, cemaat teşkilâtları ve sadece ayrı gruppalar faaliyet kösterip, bularnıñ er biri öz saylavcılarına tesir etmege istey.

Öz menfaatları oğrunda iş körgenleri alda halq içün eyilik yapmaq isteginden ep uzaqlaşalar”, – dedi R. İlyasov.

“Er bir insan ne qadar bermege bilse, bunıñ qadar zengindir. Men musulmanım. Böyle allarda İslâm bizlerni er şeyni Allahqa taşlamaqnı ögrete. Alla bersin cezalarını”, – dep yekün çekti sözlerine Meclis reisiniñ muavini.
Öz maqsadları aqqında aytırken R. İlyasov semetdeşlerniñ alını eyileştirmek oğrunda real istiqballeri olğanını bildirdi.