VI çağırılış Qurultay delegatları Meclis reisi vazifesine üç namzet: Mustafa Cemilev, Refat Çubarov ve Remzi İlyasovnı kösterdiler

27 Oktâbr 2013

Aqmescitte 27 oktâbr künü Qırımtatar akademik muzıkalı-drama teatrinde VI çağırılış Qurultaynıñ 1-nci sessiyası öz işini devam etmekte.

Toplaşuvnıñ başında salonda Qurultaynıñ 243 delegatı cedvelge alınğanı ilân etildi.

Sessiya kün tertibine köre delegatlar üçünci mesele “Qırımtatar halqı Qurultayınıñ saylav organlarını seçüv: delegatlarnıñ çıqışı, namzetlerni kösterüv ve muzakeresi”

Çıqışçta bulunğan 20 delegat, reis vazifesine Mustafa Cemilev, Refat Çubarov ve Remzi İlyasovnıñ namzetlerini kösterdiler.

Reis vazifesine namzetler kösterüv protsedurası bitken soñ Mustafa Cemilev öz namzetini keri qaytardı. “İşançıñız içün teşekkür. Lâkin men bu teklifni qabul etip olamayım. Sebepleri aqqında evel de aytqan edim. Men öz namzetimni alam. Buña aqqım bar”, – dedi M. Cemilev onıñ namzetini köstergen Qurultay delegatlarına hıtap eterek.

“Menim tekrar Meclis reisi olaraq saylanmam kerekliginiñ sebeplerinden biri Halqara forum keçirilmesidir, – devam etti Cemilev. – Forumlar keçirüvni Meclis reisi vazifesinen bağlamaq olmaz. Böyle forumlar daa çoq olur. Bundan da ğayrı, bu forum olacağı-olmaycağı daa bellisiz, çünki Ukraina buña öz razılığını bermedi. Ebet forumnı Brüssel ya da Strasburgda da keçirmek mümkün, amma bu yañlıştır”.

“Diger eki namzet aqqında aytırken Mustafa Cemilev Remzi İlyasov ve Refat Çubarov munasip insanlar olğanlarını qayd etti. “Eki namzetniñ de yahşı çizgileri bar. Refat Çubarov – diplomat, halq deputatı olıp çalıştı. Remzi İlyasov da devlet qurumında çalıştı, itibarı yüksek, teşkilâtiy qabiliyeti bar, – dep añlattı M. Cemilev. – Maña qalsa bu eki insan beraber çalışsalar halq içün pek faydalı olur”.

Mustafa Cemilev Meclisniñ yañı reisini saylavnıñ neticeleri açıqlanğan soñra da Remzi İlyasov ve Refat Çubarov beraber çalışacaqlarına ümüt bildirdi. “Rey berüv başlanmazdan evel böyle teklifim bar. Bizim qaidelerimizge köre Meclis reisi özüniñ birinci muavinini saylay. Men Refat Çubarovdan şunı eşitmek isteyim, eger reis olaraq seçilse Remzi İlyasovnı özüniñ birinci muavini etip tayinleycekmi ve aksine Remzi İlyasov bu vazifege Refat Çubarovnı teklif etecekmi. Buña köre men de öz qararımnı alacam”, – dedi Cemilev.
Bundan da ğayrı Mustafa Cemilevniñ sözlerine köre eger Qurultay delegatları adı-adınen rey berüvge qoltutsalar, onıñ adı Qurultay delegatları cedvelinde soñuna qoyulmasını rica etecek. Qurultay delegatları gizli rey berüv şekilini qaldırdılar.
Reis vazifesine eki namzet tasdiqlanğan soñ Refat Çubarov ve Remzi İlyasov Qurultay delegatlarını öz programmaları ile tanış etip, Qurultay delegatları ve musafirleriniñ suallerine cevap berdi.
Şunı qayd etmeli ki, Meclis reisi vazifesine namzetlerniñ ekisi de özlerini reisniñ birinci muavini vazifesinde körmegenlerini bildirdiler.