Diniy ve ananeviy barıştırıcılar ağınen işbirlik yolunda müim bir adım

11.10.2025

Orta küz ayınıñ 8-nde Kıyivde Qırımtatar Milliy Meclisiniñ reisi Refat Çubarov, Qırım Yuqarı müftisi Ayder Rustamov ve Ulemler Şurasınıñ reisi Süleyman Hayrullayev Diniy ve ananeviy barıştırıcılar ağınıñ icracı müdiri, BMTnıñ Din ve turğun inkişaf meseleleri idarelerara taqımınıñ çoq dinli mesleat şurasınıñ reislerinden biri Dr. Muhammed Elsanusi ile körüştiler.

Körüşüvde “Birlik School” qırımtatar litseyiniñ müdiri Olğa Kıça ve Finn Church Aidniñ birleşken cemiyetler ve inklüziv barışıq meseleleri baş mesleatçısı Milla Perukangas da iştirak ettiler.

Uzun ve açıq-aydın keçirilgen subet devamında iştirakçiler Rusiye tarafından işğal etilgen Qırımdaki vaziyetni tafsilâtlıca muzakere ettiler. Qırımtatar halqınıñ aqlarınıñ kütleviy şekilde bozuluvı, yarımadanıñ maqsatlı ruslaştırıluvı ve kolonizatsiyası, musulmanlarnıñ taqip etilüvi, insanlarnıñ alıp qaçıluvı, işkence ve qanunsız apis etilüvi bu vaziyetni tasvirley.

Refat Çubarov şunı qayd etti ki, “Qırımda qanuniylikni tiklemek, tamır qırımtatar halqınıñ kollektiv aqlarını ve insan aqları ve serbestligini temin etmek içün tek yol – yarımadanıñ Rusiye işğalcilerinden azat etilmesi ve Ukrayina devletiniñ topraq bütünliginiñ ğayrıdan tiklenmesidir”.

Ayder Rustamov qayd etti ki, bu körüşüv ve Rusiye tarafından işğal etilgen Qırım şaraitinde tamır qırımtatar halqınıñ meselelerini muzakere etüv Qırım ve tamır qırımtatar halqınıñ diniy ve ananeviy barışıq saqlayıcılar ağındaki tanılması yolunda müim bir adımdır.

Doktor Muhammed Elsanusi Diniy ve ananeviy barıştırıcılar ağı “Ukrayinanıñ ve onıñ halqara seviyede tanılğan sıñırlarındaki topraq bütünliginiñ saqlanuvı, ukrayin ve qırımtatar halqlarınen birdemlik, halqara uquqnıñ qaideleri ve normalarına sadıqlıq”nı deñişmegen nazar noqtasını qayd etti.

Taraflar insan aqları qorçalavı, dinlerara dialog ve barışıq, adalet ve halqlar arasında ürmetke doğrultılğan turğun inkişaf saalarında teşkilâtlarara işbirlikni inkişaf etmege añlaştılar.