Varşavada Ali Hamzin Pötr Gülçinskiynen körüşti

07 Mart 2011

Aprel 7 künü Milliy Meclis Tış alâqalar bölüginiñ reberi Ali Hamzin “Leh Valensa institutı” fondunıñ davetinen Poloniyada bulundı ve Varşavada onıñ direktorı Pötr Gülçinskiynen körüşti. Körüşüvde İnstitut leyhalarınıñ koordinatorı Bartoş Kozakeviç ve Polşadaki qırımtatar diasporasınıñ vekili, Gdansk universitetiniñ aspirantı Nedim Üsein iştirak ettiler.

Körüşüvniñ başında P.Gülçinskiy A.Hamzinge Poloniyanıñ sabıq prezidenti, Nobel mukâfatınıñ saibi Leh Valensanı Milliy Meclis reisi Mustafa Cemilevge yazğan mektübini resmiy sürette taqdim etti.

Bundan soñ qırımtatar halqınıñ vaziyeti, Ukrainadaki siyasiy vaqialar, Milliy Meclis ve Leh Valensa institutı işbirlikleriniñ istibaqbalinen bağlı ve diger keniş dairedeki mevzular muzavere olundı. Eki taraf da, sovetler imperiyası zulumını başlarından keçirgen poloniya ve qırım halqları arasındaki olğan ananeviy tarihiy alâqalarına yüksek qıymet kestiler.

P. Gülçinskiy sabıq Sovetler Birliginde üküm sürgen kommunistik rejiminen küreşte bulunğan uquqqorçalayıcı areketiniñ emiyetini qayd etti. Poloniyadaki “Solidarnoşçç”niñ ve qırımtatar halqı milliy areketiniñ zengin tecribeleri cian tarihınıñ müim varisligini teşkil etmekteler. Bu qıymetli tecribeni ögrenmek ve yaşlarnı insan aq-uquqları ananelerini esasında terbiyelevde işletmek kerek, dedi fondnıñ direktorı.

Körüşüvniñ soñunda Pötr Gülçinskiy ve Ali Hamzin “Leh Valensa institutı” fondu Milliy Meclis arasında Ortaqlıq aqqında deklaratsiyanı imzaladılar. Bu vesiqa mücibi, meydanğa ketirilgen İşçi gruppası iyün 30 kününece Fond ve Meclis arasında İşbirlik aqqında Añlaşmanı azırlamaq kerek.
Deklaratsiyada ayrı madde olaraq Milliy Meclis İnstitutnıñ 2011 senesi insan aq-uquqlarına bağışlanğan Halqara konferentsiyağa qoltutqanı ve bu tedbirniñ teşkilâtçıdaşı olmağa azırlığı qayd etile. Mezkür mesele boyunca yaqın arada mesleatlaşuvlar ötkerilecek.

Körüşüvniñ soñunda A.Hamzin P.Gülçinskiyni 18-mayısta Qırımda ötkerilecek Milliy matem kününen bağlı tedbirlerde iştirak etmege davet etti.

Leh Valensa institutınıñ kitaphanesine milliy areketimiznen bağlı bir sıra kitaplar, şu cümleden, deviriy neşirler, olarnıñ arasında “Qırım”, “Yañı dünya”, “Avdet” gazetaları, “Qasevet”, “Yıldız” mecmuaları ediye etildi.