Türkiyede Antalya diplomatik forumı çalışıp başladı

11.04.2025

Türkiye tış işler nazirligi tarafından Türkiye prezidenti Recep Tayyip Erdoğannıñ imayesi altında teşkil etilgen dörtünci Antalya diplomatik forumı (ADF) Türkiyede olıp keçe.

Bu yılnıñ mevzusı – “Ayırılğan dünyada diplomatiyanı alıp barmaq” – artqan global bölünmelerge baqmadan, diplomatiyanı stabilleştirici faktor olaraq yañıdan baqmaq kerekligini qayd ete.

Prezident Erdoğan açılış sözünde, istiqrar tek umumiy mesüliyetlik ve areket qararlığınen mümkün olğanını qayd etti.

Forumda 147 memleketniñ vekilleri, şu cümleden 19 devlet başı, 73 nazir (olardan 59-ı tış işler naziri) ve 57 halqara teşkilâtlarnıñ vekilleri, mütehassıslar, biznes liderleri, akademikler ve studentler iştirak eteler. Forum üç kün devam etecek.

Ukrayinanı Ğarpta Tış işler naziri Andriy Sibığa, Ukraina halq mebusı, Qırımtatar halqınıñ lideri Mustafa Cemilev, Qırımtatar Milliy Meclisiniñ reisi Refat Çubarov, Meclis reisiniñ birinci muavini, Ukrayinanıñ Türkiyedeki yañı tayin etilgen elçisi Nariman Celâl, Ukrayina-Türkiye parlamentlerara dostluq gruppasınıñ reisdeşleri, Meclis reisiniñ muavini Ahtem Çiygöz ve “Qırım milliy varlıq fondu” halqara hayriye fondunıñ reisi Lenur Mambetov temsil eteler.

Forum programmasında iklim deñişmesi, terrorizmge qarşı küreş, gumanitar yardım, raqamlaştıruv, aşayt havfsızlığı ve suniy zekâ kibi esas global meselelerge bağışlanğan 50-den çoq sessiya bar. Diplomatiyanıñ ziddiyetlerni çezüv ve kerginleşken vaziyetlerde halqara işbirliginiñ ilerilemesi içün rolüne diqqat ayırıla.