Rusiye apishanesinde qırımtatar mabüsi Rustem Virati elâk oldı

12 March 2025

Ulyanovsk vilâyetiniñ Dmitrovgrad şeerinde Rusiye apishanesinde qırımtatar mabüsi Rustem Virati elâk oldı.

Herson vilâyetiniñ Geniçesk rayonınıñ sakini Rustem Virati evinde keçirilgen bir çoq tintüvden soñ, 2023 senesi baarde Rusiye işğalcileri tarafından tutuldı. O, 2015 senesinden başlap Qırımnıñ iqtisadiy qamaçavına yardım etkeninde ve Noman Çelebicihan adına qırımtatar batalyonında iştirak etkeninde qabaatlandı.

Belli olğanı kibi, apiske alınğan soñ Rustem Virati çoq işkencege oğratıldı ve pek köteklendi. Makeme oturışları qapalı şekilde keçti. 8 yıllıq sert rejim cezasından soñ, başta Ufağa, soñra ise Ulyanovsk vilâyetiniñ Dmitrovgrad şeeriniñ tüzetüv müstemlekesine ketirildi, o yerden onıñ ölümi aqqında haber keldi.

2025 senesi kiçik aynıñ 10-nda mabüsniñ ölümi aqqında ögrendiler, lâkin tam tarihı ve ölüm sebebi şimdilik belgilenmedi.

Rustem Viratiniñ apayı ve üç balası qaldı.

Qırımtatar Milliy Meclisi elâk olğannıñ yaqınları ve soy-soplarına taziyelerini bildire.

Allah rahmet eylesin!