Türkiyedeki Ukrayina elçihanesinde sürgünlikniñ 81-nci yıllığı munasebetinen tedbir olıp keçti

22.05.2025

Mayısnıñ 21-nde Türkiyedeki Ukrayina elçihanesi qırımtatar halqınıñ sürgünligi-genotsidiniñ 81-nci yıllığı munasebetinen matem toplaşuvını keçirdi.

Tedbirni Türkiye parlamentiniñ mebusları, çetel elçileri ve diplomatları, Tış işler nazirligi ve Türkiye Cumhuriyetiniñ yetekçi siyasiy firqalarınıñ vekilleri, Türkiyeniñ çeşit bölgelerinden ukrayin cemiyetiniñ ve qırımtatar diasporasınıñ faalcileriniñ büyük sayısı, Qırımtatar Milliy Meclisiniñ azası Gayana Yüksel ziyaret ettiler, ve Meclis reisi Refat Çubarov onlayn şekilde qatıldı.

Öz çıqışında Qırımtatar Milliy Meclisiniñ reisi Rusiyeniñ Qırımnıñ vaqtınca işğali sebebinden peyda olğan telükeler aqqında hatırlattı ve qırımtatar halqını qorçalamaq ve yarımadanı işğalden qurtarmaq içün ğayretlerni daa da birleştirmege çağırdı.

Türkiyedeki Ukrayina işlerinden vaqtınca vekâletli Oleksiy Çernışev qırımtatar halqına taziye bildirdi ve qırımtatarlarnıñ aqları ve menfaatlarını qorçalamaqnıñ müimligini qayd etti. Bu işaretler, Adalet ve Kalkınma Partisiniñ reisiniñ muavini Kürşat Zorlu ve Türkiye prezidentiniñ baş mesleatçısı Yalçın Topçudan tedbir iştirakçilerine yollanılğan muracaatlarda da duyuldı.

Tedbirniñ soñunda “Qırım ailesi” icadiy taqımınıñ iştirakçileri sürgünlik faciasına bağışlanğan şiirlerni ukrayin ve qırımtatar tillerinde oqudılar.