Ukrayina Milliy filarmoniyasında “Menim Qırımım” kontserti olıp keçti

19.05.2025

Qırımtatarlarnıñ sürgünliginiñ 81-nci yıllığına Ukrayina Milliy filarmoniyasında Dilâver Osman dirijörniñ reberligi astında türlü nesillerniñ qırımtatar bestekârlarınıñ eserlerinen ibaret olğan programma çalınğan kontsert olıp keçti.

“Elvira Emirniñ 1-nci simfoniyası acınıqlı bir şekilde tekrarlana – ayrı aletlerniñ nazik, tınç ifadeleri hor ve orkestrniñ yüksek seslerinen sıñırlana ve müellifniñ şahsiy duyğularını bildire. Ve Üsein Bekirovnıñ ustalıqlı fortepiano kontserti – klassik muzıka ve kino muzıkasınıñ bağlanması parlaq eser – yaratıcılığı ve sezgirliginen şaşıra”, – dep tedbir teşkilâtçıları tarif ettiler.

Qırımtatar Milliy Meclisiniñ reisi Refat Çubarov kontsert başlamadan evel yapqan çıqışında sürgünlikte keçken balalıq hatırlavlarınen paylaşa, ana-babasınıñ ikâyeleri, Qırım aqqında hayalleri, Vatanına qaytması ve Rusiye işğali sebebinden 11 yıldır anasını körmemesi aqqında hatırlay.

“Ceza almayıp qalğan yamanlıq qayta bilir. O, daa beter cinayetlernen qaytar. Buça, Ğostomel, Mariupol, Herson balalarınıñ hatırlavları nasıl olacaq bilmeyim, amma bir şey bilem – bu cenk, ğalebe qazanmaq ve işğal etilgen topraqlarnı azat etmekten ğayrı, bütün bu pisliklerni, bütün bu barbarlarnı cezalandırmaqnen yekünlenmek kerek, ya da olar kene bizge, balalarımızğa qarşı kelecekler. Yaramazlıq cezalandırılmalı!”, – dedi o.