Mecliste yunan-roma küreşinde dünya çempionı İrfan Mirzoyev tantanalı şekilde qarşılandı

25.10.2025

Orta küz ayınıñ 25-nde Kıyivdeki Qırımtatar Milliy Meclisiniñ ofisinde İrfan Mirzoyevnen – keçenlerde 23 yaşına qadar sportçılar arasında 77 kg ağırlıq kategoriyasında dünya çempionatında altın medal qazanğan ve yunan-roma küreşinden dünya çempionı olğan qırımtatar sportçusınen – tantanalı körüşüv olıp keçti.

Qırımtatar Milliy Meclisiniñ azaları ve cemaat vekilleri yañı dünya çempionı ve onıñ idmancısı Lenur Temirovnı Ukrayinağa hayırlamaq içün toplandılar.

Onıñ qayd etkenine köre, bu ğalebe tek sportçunıñ ve qorantasınıñ şahsiy ğalebesi degil de, bütün qırımtatar halqınıñ ğururıdır. O, İrfannıñ sport karyerasınıñ nevbetteki basamağı Olimpiya oyunları olacaq, dep ümüt etkenini bildirdi.

İrfan, çempionlıqqa qadar yolunıñ ikâyesini paylaşıp, er keske destek ve işanç içün teşekkür bildirdi.

Meclis reisi Refat Çubarov öz hayırlav sözünde qırımtatar sportçularına daima qol tutqan ortaq ve fondlarğa teşekkür bildirdi ve cemaat ayatınıñ çeşit saalarında qırımtatarlarnı temsil etmek müimligini qayd etti.

“Er bir şahsiy muvafaqiyet – bütün halqnıñ muvafaqiyetidir. Sportçularımızğa qol tutmaq içün elimizden kelgenini yapmaq kerekmiz”, – dep o qayd etti.

Qırımtatar Milliy Meclisi adından Refat Çubarov İrfan Mirzoyevge sportta muvafaqiyetleri, irade küçü, Ukrayina ve qırımtatar halqını halqara sanada lâyıq temsil etkeni içün fahriy yarlıqnı berdi.

Hatırlatamız ki, bu – İrfan Mirzoyev ve onıñ idmancısı Lenur Temirovnıñ dünya çempionatındaki birinci altınıdır. Bundan evel sportçu bir qaç kere dünya ve Avropa çempionatlarında ğalip çıqqan edi. U23 dünya çempionatı Novıy Sad şeerinde (Serbiya) olıp keçti.

Qırımtatar sportçusına Ukrayinanıñ yunan-roma küreşi federatsiyası, Qırımtatar Milliy Meclisi, “Qırım cebesi”, Qırım milliy varlıq fondu ve Ukrayina Prezidentiniñ Qırım Muhtar Cumhuriyetindeki Temsilciligi destek köstereler.