Kıyivde “Olmağan balalıq” sergisi açıldı

22.10.2025

Orta küz ayınıñ 21-nde Kıyivde, Ukrayin medeniyetiniñ belli erbapları müzeyinde, qırımtatar siyasiy mabüsleriniñ balalarına bağışlanğan “Olmağan balalıq” fotoresim sergisi taqdim etildi.

“Qırımnıñ vaqtınca işğaliniñ on birinci yılında 367 bala babasız qaldı, olardan 246-sı – çağına yetmegenler. Çoqusı içün tintüv, apis ve mahkemeler qorqu, telâş ve beklev basqısı altında keçken balalıqnıñ bir parçası oldı”, – dep ZMINA insan aqları merkeziniñ sergi teşkilâtçıları tarif eteler.

“Olmağan balalıq” fotoresim sergisi, 2020 ve 2025 seneleri yapılğan fotoresimlerden ve balalarnıñ ana-babalarına mektüplerinden ibaret, olar yıllar keçkenini, balalar büyügenini ve ana-babaları alâ daa yanlarında olmağanını köstere.

“Rusiye tarafından yalıñız qırımtatar ve musulman olğanları içün apiske alınğan bütün siyasiy mabüslerniñ adlarını hatırlaymız. Amma er biriniñ arqasında Rusiye istilâsınıñ adsız bir qaç qurbanı tura – olarnıñ tuvğanları: ana-babaları, apayları ve – eñ zayıfları – repressiyalarnıñ kölgesinde keçken balalığı olğan oğulları ve qızları”, – dep serginiñ tarifinde bildirildi.

Leyhanıñ kuratorı ve qurulışnıñ müellifi iştirakçilerge muracaat etip, ukrayinler ve dünya vaqtınca işğal etilgen Qırımda yüz bergen adaletsizlik aqqında bilmeliler, dep ayttı:

“Balalarnıñ ne qadar mektüp ve fikirler yazmağanlarını ve daa ne qadar devam etecegini tasavvur etmege tırıştım… “Selâm aleyküm” ibaresi, aman-aman er bir balanıñ babasına yazğan mektübi, “Sizge barışıq tileyim” olaraq tercime etile – bu men içün pek timsalli oldı. Bu sözler, qurulışnıñ adı oldı. Ananeviy selâmlaşnıñ sesi deñişti – aynı vaqıtta em acılıq, em de ümüt ola.

Açılışta Qırımtatar Milliy Meclisiniñ reisi Refat Çubarov, Ukrayina Prezidentiniñ Qırım Muhtar Cumhuriyetindeki Daimiy Temsilcisiniñ muavini Denıs Çıstikov ve cemaat sektorınıñ vekilleri bar ediler.

Sergi Ukrayinanıñ belli medeniyet erbapları müzeyinde (Kıyiv, Saksağanskıy soqağı, 97) eki afta devam etecek.