Kıyivde “Qırım ve Qırım sakinleriniñ medeniy temsilciligi” munaqaşası olıp keçti

27 January 2025

Qara qış ayınıñ 26-nda Ekinci cian cenkinde Ukraina tarihınıñ milliy müzeyinde Ukraina Prezidentiniñ Qırım Muhtar Cumhuriyetindeki Temsilciligi tarafından teşkil etilgen “Qırım ve Qırım sakinleriniñ medeniy temsilciligi” munaqaşası olıp keçti.

Muzakere iştirakçileri Qırımnıñ kimligi, tarihı, medeniyeti ve kelecegi meselelerini muzakere etip, yarımadanı ukrain cemiyetinde yañıdan baqmaq müimligini qayd ettiler. Munaqaşağa Qırımtatar Milliy Meclisiniñ reisiniñ birinci muavini Nariman Celâl, jurnalist ve cemaat erbabı Mavile Halil, aktör ve rejissör, Qırım eviniñ müdiri Ahtem Seytablayev, ZMINA insan aqları merkeziniñ adliye müdiri Olena Lunöva, jurnalist ve televizion alıp barıcısı Kostântın Ğrubıç ve LiRoom mediasınıñ baş muarriri ve tesisçisi Oleksiy Bondarenko qoşuldılar. Munaqaşa “Cenk: ters istiqbal” leyhasınıñ idarecisi Marına Boğuş tarafından idare etildi.

Nariman Celâl Qırımnıñ kerçek yüzüni qaytarmaq müimligini qayd etti, yarımadanıñ çoq asırlıq medeniy mirasını şekillendirüvde Ukrainanıñ tamır halqları: qırımtatarlar, qaraylar, qırımçaqlar ve farqlı milliy azlıqlarnıñ vekilleriniñ rolüni qayd etti. Onıñ qayd etkenine köre, “Qırımlı” ıstılası, Rusiye teşviqatında faal qullanılğan “Qırım sakini” ıstılasınıñ menfiy manasını yoq etmek içün büyük imkânlarğa saiptir. O, Qırımnıñ qavrayışını yarımadanıñ tarihı üzerinde qurmağa teklif etip, kütleviy medeniyette ve tasilde müstemlekeviy laflarnı meydanğa ketirmek müimligini qayd etti.

“Ukrainliler siyasiy bir millet ola, ve bizim vazifemiz – öz tarihımızğa muracaat etmek, ondan derslerni almaq ve kelecegimizni uydurılğan qıymetler ve qavrayışlar esasında degil, kerçek qıymetler esasında qurmaqtır. Qırımtatarlar vatandaş cemiyetiniñ ayırılmaz bir parçası olaraq qabul etilmeli, ayrı ya da yabancı bir şey olaraq degil, çünki Rusiye “bizimki degil” subetini tarqata”, – dep Nariman Celâl qayd etti.