T. Şevçenko adına KMUde “Qırım: serbestlikni doğurğan muqavemet” munaqaşası olıp keçti

20.05.2025

Mayısnıñ 20-nde Taras Şevçenko adına Kıyiv milliy universitetinde “Qırım: serbestlikni doğurğan muqavemet” adlı panel munaqaşası olıp keçti, maqsadı – işğal etilgen yarımadadaki yaşlar arasında olğan qarşılıqnı aydınlatmaq, şahsiy ikâyelerni seslendirmek, Rusiye repressiv rejiminen şahsen qarşılaşqan insanlarnı eşitmek.

Munaqaşalarda Qırımtatar Milliy Meclisiniñ reisi Refat Çubarov, Ukrayina Prezidentiniñ Qırım Muhtar Cumhuriyetindeki Daimiy Temsilcisi Olğa Kurışko, Qırım sabıq siyasiy mabüsi Leniye Umerova, arbiy hızmetçi, Qırım sakini Artem Kiselöv, Crimean Human Rights Group idare reisi Olğa Skrıpnık iştirak ettiler. Tedbirni Temsilcilikniñ malümat temin etüv bölüginiñ reberi Yevhen Bondarenko idare etti.

Qırımtatar Milliy Meclisiniñ reisi Refat Çubarov öz çıqışında qırımtatarlarnıñ muqavemeti ve qırımtatar halqınıñ genotsid fedalarınıñ hatırasını añmaq müimligi aqqında tarif etti. Onıñ qayd etkenine köre, bugünki Rusiye basqınıñ modeli şuralar deviriniñ ameliyatlarından farqlı olaraq bayağı quvetleşti.

“Qırımda ne olğanını ve işğalge qarşı narazılıq bildirmek içün nasıl imkânlar bar olğanını añlamaymız. Evel, şuralar devirinde, eger faal sürette narazılıq bildirse ediñiz, sizni taqip eter ediler, basqı yapat ediler. Şimdi Qırımda vaziyet bam-başqa, anda daima öz sadıqlığıñıznı köstermek kerek, aksine sizni almağa kelirler. Zorbalıqsız qarşılıq köstergen insanlar, işğalli memuriyetnen işbirlik yapmağanlar – cesür insanlardır, ve böyleler yüz biñlernen bar”, – dep Refat Çubarov qayd etti.

Tedbir devamında “Serbest Qırımğa mektüpler” teşebbüsiniñ lokatsiyası çalışqan edi, ada istegen er kes qanunsız sürette apiske alınğan Ukrayina vatandaşlarına qol tuta bile edi.