V çağırılış Qırımtatar halqı Qurultayınıñ kelecek sessiyası ve kün tertibindeki meseleler

17 Iyül 2012

2012 senesi iyül 17-de 5-nci çağırılış Qurultaynıñ olacaq 4-nci sessiyası arfesinde olıp keçken matbuat konferentsiyasında Qırımtatar halqı Meclisi reisiniñ birinci muavini Refat Çubarov V çağırılış Qırımtatar halqı Qurultayınıñ nevbetteki sessiyağa azırlıq, kün tertibine qoyulğan meseleler aqqında aytıp, Ukraina ve Qırımdaki içtimaiy-siyasiy ayatına dair kündelik adiseler boyunca suallerge cevap berdi.

Qırımtatar halqı Meclisi reisiniñ birinci muavini Refat Çubarov V çağırılış Qırımtatar halqı Qurultayınıñ nevbetteki sessiyası eki kün devamında çalışacağını bildirdi.

“V çağırılış Qırımtatar halqı Qurultayınıñ delegatları sessiya devamında birinci nevbette yañı çağırılacaq Qurultay delegatlarını saylav, Ukraina halq deputatlarını seçüv ve qırımtatar milliy gimni ile bağlı meselelerni muzakere etecekler, – dedi R. Çubarov.- Eki kün çalışuv devamında delegatlar Qırımtatar halqı Meclisiniñ reisi Mustafa Cemilevniñ maruzasını, bunıñ kibi de Teftiş komissiyasınıñ esabatını diñleycekler”.

R.Çubarov şunı da qayd etti ki, Qurultay delegatlarını saylav aqqında yañı nizamğa köre Qurultay delegatlarını seçüv qırımtatarlar ve aile azaları tarafından doğrudan-doğru gizli rey berüv yolunen saylanacaq. “Evel delegatlar eki basqıç saylav sisteması boyunca seçile ediler. Başta saylavcılar saylayıcılarnı belgiler, olar ise konferentsiyağa toplanıp Qurultay delegatlarını sayladılar.

“Ukraina halq deputatlarını saylavğa kelsek, – dey R. Çubarov, – biz alâ daa siyasiy ortaqlarımıznen söyleşüvlerni devam etemitz. Bugünde-bugün bir sıra tekliflerge malikmiz, lâkin konsultatsiyalar daa yekünlenmedi. Men bellesem, iyül 21-de Qurultaynıñ birinci künü delegatlarğa şu söyleşüvler neticesinde peyda etilgen tekliflerni bildirirmiz.

Eger Meclis iç bir siyasiy küçnen añlaşıp olamasa, saylavlarnı boykot etecekmi, kibi sualge Refat Çubarov Meclis iç bir areketke çağırmaycağını, çünki qararnı tek Qurultay delegatları alacağını bildirdi. Meclis reisi birinci muavininiñ fikrince, Meclis boykot ilân etmeycek.