V çağırılış Qırımtatar halqı Qurultayınıñ 4-nci sessiyasına azırlıq boyunca teşkiliy hızmetniñ toplaşuvı

05 Iyül 2012

2012 senesi iyül 5-te V çağırılış Qırımtatar halqı Qurultayınıñ 4-nci sessiyasına azırlıq boyunca Teşkiliy hızmetniñ toplaşuvı Meclis reisiniñ birinci muavini Refat Çubarovnıñ reisliginde olıp keçti.

Toplaşuv devamında Teşkiliy hızmet azaları milliy qurultaynıñ 4-nci sessiyasını alıp baruvnıñ tahminiy tertibiniñ soñki leyhasını tasdiqladılar, bunıñ kibi de milliy qurultaynıñ 4-nci sessiyasını azırlav boyunca tedbirler planını muzakere ettiler.

Belgilengen tedbirlerni azırlav ve keçirüv içün mesülietli insanlarnıñ esabatı, tedbirler azırlav ketişatı boyunca malümat diñlenildi. Teşkiliy hızmet azaları Qurultaynıñ 4-nci sessiyasınıñ musafirlerine davetnamelerni azırlap yolladılar. Qırımtatar halqı Qurultayınıñ reglamentine binaen yaqın vaqıtta bütün delegatlarğa davetname, Qurultay işiniñ tertibi ve qararlar leyhası yollanılacaq.

V-nci çağırılış Qırımtatar halqı Qurultayı 2-nci ve 3-ünci sessiyalarınıñ materiallarından tertip etilgen cıyıntıqnıñ neşiri közde tutula. Jurnalistlerni haberdar etmek ve akkreditatsiyadan keçirmek tertibi belgilendi. Toplaşuvnıñ neticeleri boyunca konkret avaleler berilip, eda etüv müddetleri belgilendi.

Malümat içün: U çağırılış Qırımtatar halqı Qurultayınıñ 4-nci sessiyası 2012 senesi iyül 21-22 künleri Aqmescitte ötkerilecek.

Qırımtatar halqı Qurultayınıñ reglamentine binaen Qurultay sessiyasını azırlamaq ve keçirmek içün Qırımtatar halqı Meclisi Teşkiliy hızmetni tesis etti. Qurultaynıñ nevbetteki sessiyasında aşağıdaki meseleler baqılması közde tutula:

– U1 çağırılış Qırımtatar halqı Qurultayına delegatlarnı saylav aqqında,

– Ukraina halq deputatlarını saylav aqqında

-Qırımtatar milliy gimni aqqında

Qırımtatar halqı Qurultayınıñ kün tertibi Qurultaynıñ sessiyasında delegatlarnıñ rey berüvinen tasdiqlana