Ankarada Türkiyeniñ eñ büyük qırımtatar teşkilâtınıñ 70 yıllığı qayd etildi

10.12.2025

İlk qış ayınıñ 9-nda Ankarada Türkiyeniñ eñ büyük ve eski qırımtatar cemaat teşkilâtı olğan Qırımtatarlarnıñ medeniyet ve yardımlaşma derneginiñ (Kırım Türkleri Kültür ve Yardımlaşma Derneği) 70 yıllığı qayd etildi. Tedbirde Türkiye Cumhuriyetindeki Ukrayina Elçihanesi, Qırımtatar Milliy Meclisi, ukrayin ve qırımtatar cemiyetiniñ vekilleri, em de Türkiye ve Ukrayinanıñ siyasiy ve cemaat erbapları iştirak ettiler.

Bayram kontsertinde “Cıyın” qırımtatar oyun ansambli, ukryain ve türk çalğıcıları iştirak ettiler.

Qırımtatar Milliy Meclisi adından bayram iştirakçilerine Meclis azası Gayana Yüksel muracaat etti. O, Meclis reisi Refat Çubarovnıñ hayırlav mektübini oqudı. Mektüpte derneklerniñ tuvğan Qırımı tışında qırımtatar kimliginiñ, medeniyetiniñ ve halqnıñ birliginiñ saqlanmasında tarihiy emiyeti qayd etildi.

Qırımtatar diasporasınıñ Ukrayina-Türkiye munasebetleriniñ pekitilmesinde ve qırımtatar halqınıñ aqları oğrunda küreşiniñ ve Qırımnıñ işğalden azat etilmesiniñ halqara desteginde müim rolü qayd etildi. Mecburiy köçüvniñ qıyınlıqlarına baqmadan, diaspora serbestlik, Ukryaina mustaqilligi ve Qırımnıñ qaytarıluvı meselelerini faal sürette devam ete.

Bayram, 70 yıl devamında öz medeniyetini saqlağan ve halqnıñ öz aqları oğrunda küreşine qol tutqan Türkiyedeki qırımtatar milliy areketiniñ küçüni tasdıqlay.