Ankarada “İrpin – menim evim” adlı kitap türk tilinde taqdim etildi

03.10.2025

Türkiyedeki Ukrayina Elçihanesinde “İrpin – menim evim” adlı kitap türk tilinde taqdim etildi. Teşkilâtçılar, hususan, bu neşirniñ peyda oluv yolu aqqında tarif ettiler. İşğalniñ başında eñ facialı epizodlardan biri, duşman Ukrayina paytahtına yaqınlaşqanda onı toqtatqan qaraman-şeer İrpinniñ ikâyesi oldı. Bu yerde rusiye işğalcileri ulu cenkniñ ilk aylarında vatandaşlarğa qarşı kütleviy cenk cinayetlerini yapqan edi. İrpin o vaqıt ukrayin ruhunıñ qaviyligi, itibarı ve küçüniñ timsali oldı.

“İrpin – menim evim” kitabı – 2022 senesiniñ vaqialarını balalarnıñ közlerinen, olarnıñ şiirler, ikâyeler, resimlernen yazılğan cenk kündeliklerinen añlata. Kitap saifelerinde balalarnıñ qorquları ve ümütleri, tuvğan şeerine olğan sevgisi ve barışıq arzusı canlana. Bu ikâyeler iç bir memleketniñ balaları yaşamaq kerek olmağan ikâyeler. Amma olar sağ qaldılar. Ve bu tecribeni ebediyen saqlaycaqlar.

Leyhanıñ koordinatorı olğan Qırımtatar Milliy Meclisiniñ azası Gayana Yükselniñ aytqanına köre, kitapnı türk tilinde neşir etmek ğayesi 2024 senesi ilk küz ayında, Qırımtatar Milliy Meclisiniñ davetinen Kıyivge Türkiye ve Romaniya Qırımtatar teşkilâtları platformasınıñ ve Ukrayina-Türkiye dostluq birliginiñ vekilleri kelgen soñ peyda oldı. Resmiy körüşüvler vaqtında olar İrpinege de barğanlar, anda olar bu kitapnı ilk sefer körgenler. İşte, böyle bir fikir peyda oldı: ukrayin balalarınıñ sesleri Ukrayina tışında daa yüksek sesnen duyulsın.

Kitap üzerinde büyük bir taqım çalıştı:

taqdim merasimi Türkiyedeki Ukrayina Elçihanesi ve şahsen Türkiyedeki Ukrayina Elçisi Nariman Celâlnıñ desteginen keçirildi.

leyhanıñ idarecisi, Qırımtatar Milliy Meclisiniñ azası, Şefiqa Gaspıralı adına Halqara qadınlar birliginiñ reisi Gayana Yüksel;

ğayeniñ teşebbüsçisi, Türkiyedeki Qırımtatarlarnıñ medeniyet ve yardımlaşma cemiyetiniñ Merkeziy ofisiniñ reisiniñ muavini İsmet Yüksel;

muarrirler Oya Deniz Çonğar Şagin ve Könül Şamil-qızı;

Şefiqa Gaspıralı adına Halqara qadınlar birliginiñ azalarınıñ iştirakinen;

leyha Ukrayina-Türkiye dostluq birliginiñ reisi Celil Sümer tarafından maliye etildi;