Uquq qorçalayıcılar: işğalciler qırımlılarnı mobilizatsiya etilgenlerge arbiy urba almağa rica eteler

30 Sentâbr 2022

Qırımnıñ sakinleri mobilizatsiya etilgenlerge arbiy urba almağa ricasınen bir beyanat aldılar. CrimeaSOSnıñ İdaresiniñ başı Oleksiy Tilnenko bu aqqında haber berdi.

– Bilgilerimizge köre, Bağçasaray rayonında yaşağan kişiler, askerler içün kerekli eşyalarnı tapmağa çağıruvınen bir beyanat aldılar. Şu anda Aqyar ve Kefe şeerlerinde bulunğan mecburen mobilizatsiya etilgen erkekler hızmet etmek içün adiy ve mahsus eşyalarnen temin etilmediler, – dep Oleksiy Tilnenko añlattı.

Yerli ‘tek rusiye’ fırqasınıñ vekilleri, mobilizatsiya etilgen erkekler içün adiy eşyalar ve arbiy urba toplamağa ricasınen beyanatnı yolladılar. Bu cedvelde şunları rica eteler: termik iç çamaşırı, çoraplar ve trusikler, ilâçlar, gigiyena eşyaları, yataqlı çuvallar, qaynatıcılar, duş içün papuçlar, dögmeli telefonlar, 60 litrli arqa çantaları, balaklava şeklindeki qalpaqlar, ayaq tabanlıqları v.b.

Hatırlatamız ki, IV. Cenevre şartnamesiniñ 51. maddesi tarafından işğal etilgen topraqlarnıñ sakinleriniñ işğal ordusına mobilizatsiyası yasaqlana ve cenk bir cinayeti sayıla. Ukraina vatandaşlarını öz devletine qarşı arbiy areketlerde iştirak ettirüv de ayrı bir cenk cinayetidir.

İşğal etilgen Qırımnıñ mobilizatsiya etilgen sakinleriniñ Herson vilâtetindeki arbiy areketlerde iştirak etmeleri içün olarğa arbiy azırlamalar bermeden yollaylar.

Mobilizatsiyadan qaçınmağa istegen qırımlılar içün QMCniñ Prokurorlığı ‘sıcaq hat’nı açtı. Hitaplar Telegram, Viber, WhatsАpp ve Signal qulanınmlarında alına: +38 (096) 700 16 00.