Ulu mütefekkkir İsmail Gasprinskiyniñ hatırasına

21 Mart 2012

2012 senesi mart 21 künü ulu qırımtatar mütefekkiri, yazıcı, naşiri ve birinci türk tilli “Terciman” gazetasınıñ esasçısı İsmail Gasprinskiy doğğanınıñ 161 yıllığına bağışlanğan tantanalı tedbirler keçirüv çerçivesinde Aqmescitte onıñ eykeline çeçekler qoyuldı.

Tantanalı merasimde qırımtatar halqı milliy areketiniñ iştirakçileri, Qırımtatar halqı Meclisi, qırımtatar cemaat teşkilâtlarınıñ azaları, Qırım müendislik pedagogika universitetiniñ rektorı Fevzi Yaqubov yetekçiliginde ocaları ve studentleri, Tavriya Milliy universiteti qırımtatar ve şarq filologiyası fakultetiniñ ocaları ve studentleri, Aqmescitteki Eşref Şemi-zade adına milliy mektepniñ direktorı Nariman Ahmedov ve talebeleri, İ. Gasprinskiy adına qırımtatar cumhuriyet kütüphanesiniñ hadimleri iştirak ettiler.

Qırım Nazirler Şurasını merasimde nazir Ölga Udovina temsil etti.

Tantanalı merasim Kebir caminiñ imamı Niyazi Ramazanovnen beraber oqulğan duadan başlandı.

İ. Gasprinskiy eykeline çeçek qoyuv merasiminde Bütündünya qırımtatarlar kongressiniñ prezidenti, Milliy Meclis reisiniñ birinci muavini Refat Çubarov, Qırım müendislik-pedagogika universitetiniñ rektorı professor Fevzi Yaqubov, Qırım Nazirler Şurası Reisiniñ muavini Ölga Udovina, qırımtatar tasil hadimleri “Marifçi” birleşmesiniñ reisi, Meclis Maarif ve medeniyet idaresiniñ başı, Qırım Yuqarı Şurasınıñ deputatı Safure Kacametova çıqışta bulundılar.

Mütefekkirniñ Aqmescitteki eykeline çeçekler qoyuv merasiminiñ iştirakçileri Bağçasarayğa, İsmail Gasprinskiyniñ qabirini ziyaret etmek, eykeline çeçek qoymaq ve İ. Gasprinskiy müzeyinde keçirilecek “İsmail Gaprinskiyniñ dünyası” konferentsiyasında iştirak etmek içün, yol aldılar.