Ukrayina Prezidenti Petro Poroşenko ve Mustafa Cemilev ile Refat Çubarovnıñ iş körüşüvi

09 Avgust 2017

Avgust 8 künü, Ukrayina Prezidenti Petro Poroşenko qırımtatar halqınıñ yetekçisi Mustafa Cemilev ve Qırımtatar Milli Meclisniñ reisi Refat Çubarov ile iş körüşüvni keçirdi.

Körüşüv devamında vaqıtınca işqal etilgen Qırım yarımadasındaki vaziyetke dair aktual meseleler muzakere etildi. Prezidentke, hususan, istilâ altında bulunğan Qırımda qırımtatarlar ve ukrayinlerge qarşı tatbiq etilgen repressiyalar aqqında malümat berildi.  

Bu sualler doğrultısında Ukrayina devlet akimiyet organları alıp barğan semereli faaliyetiniñ emiyetine urğu yapıldı. Şu cümleden, Qırımda yaşağan ukrayin vatandaşlarnıñ muracaatlarına baqmaq ile doğrudan mesül olğan ve muvaqqaten Herson şeerinde yerleşken Ukrayina Prezidentiniñ Qırım Muhtar Cumhuriyeti temsilciligi de añıldı.  

Ukrayina Anayasasına kirsetilecek deñişüvlernen bağlı bir sıra suallerniñ muzakeresi devamında Prezident, Anayasa komissiyasınıñ leyihasını Ukrayina Yuqarı Şurasına yollamaq içün endi sentâbrde beklegenini bildirdi. Belli olğanı kibi, mezkür deñişüv ve ilâvelerniñ Ukrayina Anayasasında Qırım Muhtar Cumhuriyetinen bağlı 10-ncı bölügine kirsetilmesi közde tutula.  

Körüşüv iştirakçileri, ayrıca, Qırımnı işğalcilerden azat etmek maqsadınen halqara ortaqlar ile devam etken munasebetlerdeki işbirliknen bağlı mevzusı boyunca da fikir paylaştılar.