Ukrainada stalinizmniñ ğayrıdan doğuv telükesi ve Ukrainada em de dünyada demokratiya esaslarını qorçalav aqqında

18 Mayıs 2012

2012 senesi mayıs 16 künü Ukraina Yuqarı Şurası “Milliy mensüpligi boyunca sürgün etilgen halqlarnıñ aqlarını ğayrıdan tiklev aqqında” qanunnı muzakere etken vaqıtta Ukraina Kommunist partiyasınıñ yetekçisi Pötr Simonenko SSSR stalin rejiminiñ qırımtatarlarğa qarşı yapqan cinayetni – 1944 senesi mayıs 18 sürgün etilüvi ve onlarnen yıllar ğurbet illerde zornen tutulğanını açıqtan-açıq aqladı.

Birinci kere Ukraina Kommunist partiyasınıñ lideri böyle edepsiz ve hayasız şekilde Ukraina parlamentiniñ minberinden nazizizmnen bir cinaiy dep tanılğan stalinizm mevkuresine açıqçasına qoltutqanını numayış etti.

Evelden Qırımtatar halqınıñ meclisi, qırımtatar cemaat teşkilâtları stalinizm ğayelerini, milliy zıtlıqnı teşviq etken siyasetçi ve vazifedar şahıslarnı cevapkârlıqqa çekmek aqqında defalarca ayttı. Lâkin Ukraina uquqqoruv organlarına bütün bizim muracaatlarımız cevapsız qaldı. Bundan da ğayrı qanlı cellât ve totalitar rejimniñ esasçısı Stalinge eykel qoymaq, cumhuriyetimiz soqaqlarında insanlar ve umumen milletler arasında dava qozğaycaq çeşit-türlü neşirlerni ve laflarnı tarqatmaq endi Ukrainanıñ aliy uquqiy organına avuşqan. İşniñ böyle ketişatı Ukrainanıñ demokratik esaslarına balta urmaq areketleri ve devletniñ milliy havfsızlığına telüke eteceginden delâlet bermekte.

Amma, Ukraina halq deputatları parlament minberinden turıp qırımtatar halqı ve diger milliy azlıqlarnıñ sürgünligini aqlaması bütün qırımtatar halqını, ayrı insanlar ve olarnıñ nesillerini doğrudan-doğru aqaret ete.

Biz, 1944 senesi mayıs 18 sürgünligi qurbanlarınıñ hatırasına bağışlanğan Bütünqırım mitinginiñ iştirakçileri Ukraina Kommunist partiyasınıñ lideri Pötr Simonenko öz çıqışını şahsiy fikir olaraq köstermek areketlerini keskin qaralaymız ve bu çıqışnı Ukraina Yuqarı Şurasında Ukraina Kommunist partiyası fraktsiyası cemi azalarınıñ pozitsiyası, dep bilemiz. Bundan kelip çıqqanımız, em de stalinizmniñ ğayelerini nasıl şekilde olsa-olsun tarqatılması demokratik devletler birligine zarar ketirecegini añlağanımız alda biz, Bütünqırım matem mitinginiñ iştirakçileri bütün demokratik devletler, Avropa Şurası Parlament Assambleyası ve ÖBSE, Avropa Birligi parlamentini Pötr Simonenkonıñ serbest dünya devletlerine kirmesini em de onıñ Ukraina parlamentiniñ azası sıfatında halqara teşkilâtlarnıñ işinde iştirak etmesini yasaqlamağa çağıramız.

Biz, dünyanıñ nazizim ve stalinizm ğayelerini tarqatmaq qanunları ile yasaq etilgen devlet ve ükümetlerniñ yolbaşçılarına olarnıñ hududlarına Ukraina Yuqarı Şurasındaki Ukraina Kommunist partiyası fraktsiyası azalarınıñ kirmesini yasaq etmek ricasında bulunamız.

Biz, Ukraina Prezidenti Viktor Yanukoviç, Ukraina Yuqarı Şurasınıñ reisi Vladimir Litvin, Ukraina Baş naziri Nikolay Azarovdan, İçki işler nazirligi ve Devlet telükesizligi hızmetiniñ, Baş prokuraturasınıñ yolbaşçılarına Ukraina parlamentinde yapılğan bu beyanat munasebetinen Ukraina qanunlarına muvafıq olsun siyasiy beyanat, olsun ameliy areketler ile öz resmiy pozitsiyasını bildirmekni talap etemiz.

Eger de devletniñ yolbaşçıları faşist stalincileriniñ bu pis areketlerine iç bir türlü cevaplanmasa biz, Ukraina Anayasası talap etkeni kibi, qırımtatar halqınıñ, umumen Ukrainanıñ çoqmilletli halqınıñ namusı ve şerefini qorçalamaq içün qudretli bir küç olmağa azırmız.

Qırımtatar halqı 1944 senesi mayıs 18 sürgünligi ve onlarnen yıllar ğurbet illerde zorluqnen tutulğanı aqibetinde elâk olğanlarnıñ hatırasına bağışlanğan Bütünqırım matem mitinginde qabul etildi.