Ukrainada qan tökülüvi ve diktatura toqtatılsın! 2014 senesi yanvar 16 alınğan diktatorlıq qanunlar lâğu etilsin! Qırımtatar halqınıñ aqları tiklenilsin! Ukrainanıñ territorial bütünligi ve mustaqilligi saqlanıp qalsın!

25 Yanvar 2014

Böyle şiarlar altında Qırımtatar halqınıñ Meclisi 2014 senesi yanvar 28 künü saat 12.00-de Aqmescitniñ merkeziy meydanında miting keçirecek.

Bu aqta Meclis reisi Refat Çubarov Meclisniñ yanvar 25 künü keçirilgen nevbetten tış kenişletilgen toplaşuvnıñ neticelerine köre bildirdi.

“Qırımda yaşağan insanlarnıñ taqdiri, yarımadada barışıq ve tınçlıq içün mesülietini añlayaraq ve Ukrainanıñ diktaturağa taymasınıñ ögüni almaq, Ukraina sakinleriniñ öldürilmesi ve qan tökülmesiniñ toqtatılması içün Meclis bütün imkân ve areketlerden faydalanacaq”, – dedi Meclis reisi Refat Çubarov

Eki saatten ziyade devam etken toplaşuv vaqtında Meclis azaları ve regional meclislerniñ reisleri Ukrainada siyasiy inqıraznıñ sebeplerini ve endi insan qurbanlarına ketirgen ep şiddetleşeyatqan zorbalıq, basqınıñ aqibetlerini er taraflama talil ettiler.

Meclis toplaşuvında iştirak etken Qurultay Teftiş komissiyasınıñ reisi Ali Özenbaş ve Merkeziy saylav komissiyasınıñ başı Zair Smedlâyev de öz tekliflerinen çıqışta bulundılar.

Çıqışta bulunğanlarnıñ ekseriyeti memlekette qan tökülmesi ve zorbalıq içün akimiyet organları mesülietlidirler. Çünki olarnıñ tışqı siyasette öz sözünde turmağanları ve tınç toplantı iştirakçilerine nisbeten ceza siyasetini qullanğanları Ukrainanıñ Kiyevde ve bir çoq vilâyetlerinde vatandaşlarnıñ kütleviy numayışlarına sebepçi oldı.

Meclis azaları Ukraina Regionlar firqası ve Kommunist partiyası fraktsiyalarınıñ azaları olğan deputatlarnıñ insannıñ temeliy aqları ve serbestliklerine açıqtan-açıq basqı yapqanlarını qaraladılar. Bunı Ukraina Anayasası ve Ukrainanıñ halqara vazifelerine zıt kelgen diktatorlıq qanunlar parlament protseduraları ve demokratik printsiplerge riayet etilmeyip qabul etilgen qanunlar ifade eteler.

“Öz qararımıznen biz qırımtatarlarnıñ ve diger millet vekilleriniñ Meclis adına yollağan ve bildirgen bir çoq muracaatlarına seslenmiş oldıq, – dedi R. Çubarov. – Bu munasebetnen Qırımtatar halqınıñ Meclisi 2014 senesi yanvar 28 künü saat 12.00-de Aqmescitniñ merkeziy meydanında miting keçirecek. Onıñ esas şiarı Ukrainanıñ diktaturağa taymasınıñ ve qan tökülmesiniñ ögüni almaqtır”.

Meclis reisi emin ki, Ukrainada barışıq ve tınçlıq faqat söyleşüvler masası başında elde etilebilir. “Planlaştırılğan mitingde Meclis Ukrainanıñ territorial bütünligi ve yanvar 16 künü Ukraina parlamenti tarafından alınğan qanunlarnıñ lâğu etilmesini talap etken şiarlarnen çıqacaq, – dep qayd etti R. Çubarov. – Biz Kiyevde ve diger vilâyetlerdeki dramatik vaqialar Qırım akimiyeti içün ders olmasını isteymiz. Real dialog aqqındaki bizim çağıruvlarımıznı akimiyet öyle de eşitmedi. Qırımtatarlarnıñ aqları qorçalanğan iç bir saa yoqtır. Şunıñ içün de bu mitingde biz yaqın aylarda yapacaq areketlerimiz planını taqdim etecekmiz. Bu açıq ve namuslı şekilde yapılacaq ki, Qırım akimiyetine cemaat ile közboyama dialoglarından vazgeçmesine yardım olsun”.

Toplaşuv devamında Meclis reisi Refat Çubarov Qırım Nazirler şurasınıñ reisinen olğan telefon qonuşması aqqında ayttı. “Anatoliy Vladimiroviç onı temin ettikleri bazı haberlernen bağlı bir “telâşlarınen” ile paylaştı. Laf, güya Meclis Qırımda memuriy binalarnı zapt etmesi aqqında ketti, – dedi Çubarov. – Men Meclisniñ böyle meramı olmağanı sebebinden “telâşlarını” başqa yerge bildirmesini, informatsiya bergenlerni ise halq arasında belli adreske yollamasını tevsiye ettim.