Ukrainada BMT İnkişaf programmasınıñ daimiy temsilcisi O.Adam Meclisni ziyaret etti

14 Sentâbr 2011

2011 senesi sentâbr 14 künü Qırımtatar halqı Meclisiniñ reisi, Ukraina halq deputatı Mustafa Cemilev BMT sisteminiñ koordinatorı, Ukrainada BMT İnkişaf programmasınıñ daimiy temsilcisi  Ölivye Adamnı qabul etti.  

Meclis ofisinde olğan körüşüvde  bunıñ kibi de BMT İP koordinatorı Adelin Göne, Ukraina BMT vekâletligi reberiniñ insan inkişafı boyunca mesleatçısı Gaspar Bergman ve BMT İnkişaf programmasınıñ Qırımdaki temsilciliginiñ programm meneceri Qurtmolla Abdulğaniyev iştirak ettiler.

Qırımtatar halqınıñ Meclisini körüşüvde  Meclis reisiniñ birinci muavini  Refat Çubarov, tışqı alâqalar bölüginiñ başı  Ali Hamzin ve Meclis Kâtibiyetiniñ başı Zair Smedlâyev temsil ettiler.

“Meclis reberlerinen körüşüvimizniñ maqsadı BMT İnkişaf programmasınıñ Ukraina ve Qırımda yapacaq faaliyeti aqqında dialognı devam ettirmektir, – dedi  Ukrainada BMT  temsilciliginiñ başı Ölivye Adam. –  Belli ki, 80-nci senelerniñ ortalarından başlap Qırımda bir çoq programmalarnı amelge  keçirgen BMT İnkişaf programması sürgünlik yerlerinden öz vatanına qaytayatqan qırımtatarlarnıñ itiyaclarını esapqa ala. Ebet, biz bundan soñ da qırımtatar halqına yardım berecek, Qırımnıñ inkişafı oğrunda işlengen leyhalarğa qoltutacaqmız”.

Subet devamında taraflar keniş meseleler dairesi, cümleden BMT İP Qırımda kerçekleştirgen leyhalarnıñ semeresi, qırımtatarlarnı yerleştirüv ve aq-uquqlarını tiklevge halqara yardım içün oñaytlı şarait yaratuv kibi problemler boyunca  fikir almaştılar.

Qırımtatar halqı Meclisiniñ reberleri Ukrainada BMT İP başınıñ ricasına seslenerek  Qırımdaki içtimaiy-siyasiy vaziyetni izaatlap, Ukraina Nazirler kabineti qırımtatarlarnı yerleştirüv boyunca bergen vadelerini eda etmegenini ayrıca qayd ettiler.  “Nevbetteki yıl da soñuna keleyata, amma sürgün etilgen adamlarnı qaytaruv ve yerleştirüv programmasını finansirlev öyle de başlanmadı. Bundan da ğayrı, devlet içtimaiy programmalarğa iç de destek bermey”, – dedi Mustafa Cemilev.

Qırımtatar halqı Meclisiniñ reisi  Mustafa Cemilev Ukrainada BMT  temsilciliginiñ başı Ölivye Adamnıñ diqqatını soñki vaqıtta pek aktivleşken “kazak” teşkilâtlarınıñ da faaliyetine celp etti. “Şu faaliyetniñ misallerinden biri Qırım boylap cemaat yerlerinde, bilhassa  şeer ve qasabalarğa kiriş ve çıqışta  haçlar tiklev allarıdır. Kazaklarnıñ bu provokatsion areketlerine Qırım nazirler şurasınıñ bugünki reberleri qoltutqanları bizni eñ ziyade raatsızlay. Böyle aqılsız siyasetni Qırımda resmiy dini pravoslav dini olğan Rusiye bile alıp barmağan edi”, dedi Mustafa Cemilev.

Refat Çubarov, BMT İnkişaf programması ve Avropa Birligi devletleri Qırımda amelge keçirgen leyhalarnıñ müimligini qayd etip, qırımtatar halqınıñ qaytuvı ve yerleşüvinen bağlı siyasiy-uquqiy meseleler çezilmesiniñ zarurlığında toqtaldı. “Bugün er kes açıq-aydın köre ki, halqara teşkilâtlarnıñ iştirakisiz bu saada ilerilev olmaz”, dedi Refat Çubarov ve qırımtatar halqınıñ aq-uquqlarını tiklev ve onıñ Ukrainada telükesizligini teminlev meseleleri boyunca Halqara forumğa azırlıq ketişatınen tanış etti.

Öz nevbetinde cenap  Ölivye Adam Halqara forum keçirilmesini maqullep, işbu tedbir qırımtatar halqı aqlarınıñ ğayrıdan tiklenmesine ve Qırımnıñ inkişaf etmesine bir siltem olacağına eminlik bildirdi. 

Cenap Ölivye Adam Kiyevde oktâbr 5 künü Meclis reberleri elçilikler ve halqara teşkilâtlarnıñ vekillerinen keçirecek körüşüvde iştirakini tasdiqladı.

Körüşüvniñ soñunda  Meclis yolbaşçıları   Ukrainada BMT  temsilciliginiñ başı Ölivye Adamğa BMT sistemasındaki halqara teşkilâtlarğa qırımtatar halqınıñ aq-uquqlarını tiklev, Qırımnı inkişaf ettirüv meselelerine ayırğan diqqatı içün teşekkür bildirdi.