Ukraina Yuqarı Şurasınıñ milletlerara munasebetler komiteti seyyar toplaşuvını Zakarpatye vilâyetinde keçirdi

05 Oktâbr 2013

2013 senesi oktâbr 1-2 künleri Zakarpatye vilâyetinde Ukraina Yuqarı Şurasınıñ milletlerara munasebetler komitetiniñ seyyar toplaşuvı ötkerildi.

Toplaşuvnıñ işinde Ukraina Yuqarı Şurasınıñ insan aqları, milliy azlıqlar ve milletlerara munasebetler komitetiniñ tamır halqlar, milliy azlıqlar, etnik gruppalar, sürgün etilgen halqlar ve milliy azlıqlar bölügine yolbaşçılıq yapqan Qırımtatar halqı Meclisiniñ reisi, Ukraina halq deputatı Mustafa Cemilev iştirak etti

Komitetniñ Ujgorod şeerinde Zakarpatye vilâyet şurasınıñ binasında eki künlük işi devamında Zakarpatye vilâyetinde milliy azlıqlarnıñ aqlarını teminlev vaziyeti, Ukrainanıñ sıñır topraqlarında yaşağan ve qoşumca qoruvğa muhtac şahıslar ve qaçaqlar aqqında Ukraina qanunları işletilmesiniñ ketişatı muzakere etildi. Parlament komitetiniñ azaları bunıñ kibi de Ujgorod milliy universiteti Avropa uquqı ve uquqşınaslıq fakultetiniñ professor, ocaları ve studentlerinen körüşip, Zakarpatye milliy azlıqları medeniyetleriniñ merkezini ziyaret ettiler.

Oktâbr 2 künü Komitet öz işini Ukrainanıñ ğarbiy şeerleri, Mukaçevo ve Beregovoda devam etip, mında da qaçaqlar vaqtınca yerleştirilgen noqtalarnı ziyaret etecek, bunıñ kibi de Ferents Rakotsi II adına Zakarpatye macar institutınıñ ocaları ve studentleri, Macaristan Devlet şurası Milliy birlik komitetiniñ yolbaşçılarınen ve romlar cemiyetiniñ vekillerinen körüştiler.

Seyyar toplaşuv çerçivesinde romalar milliy azlıq vekilleri toplu yaşağan yerlerniñ de ziyaret etilmesi közde tutula.